Sara Olsvig: Innarluutillit pisinnaatitaaffeqalissapput

Inatsisartuni ilaasortaq Martha Lund Olsen (S) Naalakkersuisut innarluutillit pillugit siunnersuutaat pakatsissutigeqqavaa, anguniangaqarfiunanilu suliniutinik nutaaliortoqarsimanngitsoq, taanna isumaqarpoq.

Atuaruk: Lund Olsenip innarluutilinnut inatsimmi nutaaliornerit maqaasivai

Oqartussaaffimmilu akisussaasuulluni Naalakkersuisoq Sara Olsvig (IA), Naalakkersuisuusimasup isornartorsiutaanut qisuariaateqarpoq.

Periarfissaqarnermiit pisinnaatitaaffeqarnermut

- Pingaarnertigut inatsisissatut siunnersuummi nutaami, inuit annertuumik innarluutillit ikiorserneqarnissamik periarfissaqarnerannit, inuit innarluutillit pisinnaatitaaffeqarnerannutallanngortitsisoqarpoq, Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq, Sara Olsvig (IA) tusagassiuutinut nalunaarummi allappoq.

Innarluuteqartunullu inatsip atuuttup inatsisissatullu siunnersuutigineqartup assigiinngequtaat nassuiaateqarfigai.

- Innarluutilinnut inatsimmi massakkut aallaaviusoq tassaavoq innarluutillit naligiimmik periarfissaqarnissaat pillugu Naalagaaffiit Peqatigiit malittarisassat nalinginnaasut. Inuit innarluutillit tapersersorneqarnissaannut inatsisissatut siunnersuummut aallaaviuvoq inuit innarluutillit pisinnaatitaaffii pillugit Naalagaaffiit peqatigiit isumaqatigiissutaat, Sara Olsvig tusagassiuutinut nalunaarummi nassuiaavoq.

Pisinnaatitaaffiit pitsanngorsaavigineqangaatsiartut

- Inuit innarluutillit tapiissuteqarfigineqarnissaanut inatsisissatut siunnersuuteqarnikkut nunatsinni innarluuteqartut pisinnaatitaaffiinik pitsanngorsaataangaatsiartussaavoq. Siullertutut innarluuteqarnerup isumaa annertusassavarput, taamaasiornikkut amerlanerit tapiissutinik pissarsisinnaalerlutillu pissarsisalissapput. Aappaattut inatsisitigut qulakkeerniarparput, Naalagaaffiit Peqatigiit Innarluutillit Pillugit nalunaarusiaanut naammassinninnerulernissarput, Naalakkersuisut allapput.

Martha Lund Olsenip ilanngullugu tikkuarpaa, innarluutillit pisariaqartitaat minnerpaamik ukiumoortumik nalilersuiffigineqartarnissaat. Inatsisissatummi siunnersuummi nutaami allassimavoq, pisariaqartitsineq annertusippat aatsaat nalilersorneqassasut

Immikkut ittumik tapersiinermi iliuusissatut pilersaarummik piumasaqarneq

- Innarluutilinnut inatsit atuuttoq malillugu meeqqat atuarfianni naammassereernerup kingorna iliuusissanut pilersaarummik taamaallaat piumasaqaateqartoqarpoq aammalu qulaajaanissaq piumasaqaataanani. Inatsisissatut siunnersuummi nutaami immikkut ittumik tapersiinermi iliuusissanut pilersaarut piumasaqaataavoq kiisalu immikkut ittumik tapersiinermi qulaajaaneq piumasaqaataalluni, Sara Olsvig qisuariaammini erseqqissaavoq.

Innarluutilinnut inatsit atuuttoq malillugu assersuutigalugu tikeraarluni angalanermi ingiaqateqarnissaq, oqilisaassivigineqarnissaq il.il. periarfissaapput.

Ulluinnarni tapersersorti

- Inatsisissatut siunnersuut malillugu inuk innarluutilik ingiaqateqarnissamik neqeroorfigineqassaaq – tikeraarluni angalanerinnarniinngitsoq, kisianni inuk innarluutilik innarluuteqarnini pissutigalugu ulluinnarni kisimiilluni angalaarsinnaanngippat. Tamatuma saniatigut kommunit oqilisaassinermi inissanik neqerooruteqarnissamik pisussaaffeqarput, Sara Olsvig erseqqissaavoq.

Taakkua saniatigut inatsisissatut siunnersuummi makku nutaat ersersarpai:

• Kommunalbestyrelsip inuk innarluutilik Nuna tamakkerlugu Innarluutilinnut sullissivimmi allanngutsaaliuilluni sungiusarnissaanik neqeroorfigisinnaavaa
• Ulluunerani neqeroorummik immikkut ittumik, meeqqat suli atualersimanngitsut annertuumik innarluutillit tapersersorneqarnissamik immikkut pisariaqartitsinerannik naammassinniffiusinnaasumik, kommunimi ulluunerani neqeroorutinut allanut tapertaasussamik, kommunalbestyrelse pilersitsisinnaavoq
• Meeqqamut annertuumik innarluutilimmut angajoqqaatut oqartussaasunut nuunnermut ikiorsiinissamik kommunalbestyrelse neqerooruteqarsinnaavoq
• Inersimasunut innarluutilinnut ulloq unnuarlu neqeroorummik matoqqasumik pilersitsineq, tassa imaappoq igalaat aamma matut silarliit paarnaaqqatinnissaat akuerisaalluni
• Inunnut innarluutilinnut kommunip neqeroorutaannut, ilaatigut tapersiissutigineqartartunut, pitsaassusissanut malitassanik allaganngorlugit kommunalbestyrelse suliaqassaaq.
• Kommunalbestyrelsip Inatsisartut inatsisaat manna naapertorlugu ingerlatsivimmi oqartussatut pisussaaffiisa malinneqarnissaanni annertuumik imaluunniit uteqattaartumik sumiginnaaneranut imaluunniit mianersuaalliorneranut kommunalbestyrelse pinngitsaaliissumik akiliisussanngorlugu Naalakkersuisut pisussaaffiliisinnaapput.
• § 23-imi kommunalbestyrelsip inunnut innarluutilinnut tapersiisarnerannut killissaliussat pingaarnerit aalajangersarneqarput.
• § 24-imi inuit innarluutillit tamakkiisumik nammineersinnaanngitsut, ikiorneqarnissamut isumassorneqarnissamullu tapersiivigineqarnissamik neqeroorfigineqarnissaat qulakkeerneqarpoq, ilanngullugit inuttut suliassat aammalu ulluinnarni suliarisassat.
• § 65-imi ukiut sisamakkaarlugit ulloq unnuarlu neqeroorutini ineriartortitsinissamut periusissamik suliaqarnissamik Naalakkersuisut pisussaaffilerneqarput.
• § 85-imi kommunalbestyrelsit innarluutilinnut siunnersuisooqatigiinnik pilersitsinissamik pisussaaffilerneqarput, aammalu siunnersuisooqatigiit suliassai piginnaatitaaffiilu aalajangersassallugit.
• § 86-imi kommunalbestyrelsit innarluutilinnut politikkimik ilusilersuissasut, aalajangersarneqarpoq.

Inatsisissatut siunnersuut ullumi marlunngornermi Inatsisartuni siullermeerneqassaaq. 2018-imilu Inatsisartut upernaakkut ataatsimiinnerini aappassaaneerneqarlunilu pingajussaaneerneqassaaq.