siulittaasussarsiorneq

Sara Olsvig IA-mut siulittaasussatut qinigassanngortippoq

Inuit Ataqatigiit sinnerlugit politikkeri pisortatigoortumik siulliulluni Inuit Ataqatigiinni siulittaasussatut qinigassanngortippoq

Sara Olsvig Inuit Ataqatigiinni siulittaasussatut qinigassanngortippoq

Sara Olsvig Inatsisartuni folketingimilu ilaasortaq Inuit Ataqatigiinni siulittaasussatut qinigassanngortippoq.

Tusagassiuutinut nalunaaruteqarpoq.

- Sukumiisumik isumaliutigereerlugu aalajangerpunga Inuit Ataqatigiit siulittaasussaattut qinersinissamut sassarniarlunga. Suliassamut piumassuseqarpunga kajumissuseqarlungalu. Nunatsinni politikkikkut ataatsimoornermik suleqatigiinnermillu pilersitseqataanissannut nukissaqartutut misigisimavunga siunnerfeqarlungalu.

- Partiit tamat akornanni suleqatigiinnissamik siunniussaqarpunga, suliassaqarfiillu minnerpaamik pingasut suleqatigiiffigineqarnissaat siunertaraara. Suliassaqarfiit tassaapput: Atugarissaarnermut politikki, aalisarnermut politikki aatsitassarsiornermullu politikki. Politikkikkut suliassaqarfiit pingasut uani taakkartukkakka tassaapput inuiaqatigiinnitsinni tunngaviulluinnartut. Tassaapput ullumikkut inuiaqatitta qanoq innerannik sinaakkusiisut aningaasarsiornitsinnillu tunngaviliisut.

- Sulissutiginiarparattaaq Inuit Ataqatigiit partiinik allanik tamanik patajaatsumik suleqateqarnissaa, aamma ukiuni makkunani partiit naalakkersuisuutitaqartut ilanngullugit. Nunatsinni innuttaasut suleqatigiittoqarnissaa kissaatigaat uagullu qinikkatut akissussaaffigaarput nunatta siunissaa pillugu ataatsimoorluta naapiffiusinnaasut naapiffigissallugit, Sara Olsvig Aasiannut, Ilulissanut Qasigiannguanullu angalasoq oqarpoq. Nuummut ataasinngorpat apriilip 21-ani utissaaq.

Sara Olsvig Inatsisartunut folketingimullu ilaasortaanera pissutigalugu isornartorsiorneqartarpoq. Inuit Ataqatigiit nuna tamakkerlugu immikkut maajip 31-ani Nuummi ataatsimeersuarneranni siulittaasunngussagaluaruni tamanna allanngussasoq oqaatigaa.

Siulittaasunngussaguni Folketingimi ilaasortaajunnaassaaq
- Ataatsimeersuarnermi siulittaasussatut qinerneqassaguma qinigaaffikka qanoq iliuuseqarfigissanerlugit pilersaaruteqarpunga. Maannakkut Inatsisartunut Folketingimullu ilaasortaavunga. Maajip 30-ani Inuit Ataqatigiinnut siulittaasunngussaguma Folketingimi ukiaru ataatsimiinnerup aallateqqinnginnerani ilaasortatut tunuarnissara aalajangiusimavara, Sara Olsvig oqarpoq.

- Sapinngisara tamaat piffissaq annertooq nunatsinni angalanermut atorusuppara tunuliaquttatsinnut innuttaasunullu tamanut patajaatsumik attaveqarluarnissarput siunertaralugu.

Aqquluaq B. Egedemi?
Kuupik Kleistip IA-mi siulittaasuujunnaarniarluni marsip 31-ani nalunaarutigimmagu, IA-mi siulersuisuni ilaasortaasut - Sara Olsvig, Juliane Henningsen, Aqqaluaq B. Egede - nalunaarutigaat siulittaasussatut qinigassanngortinnissartik ammaffigalugu.

Aalajangerneranut pissutaavoq sulinermi saniatigut inuiaqatigiilerineq pillugu ukiup aappassaa maannakkut ilinniagaqarami kiisalu siulittaasussatut piareersimasutut misigisinnginnami siulittaasussatut sassannginnini ilaatigut Juliane Henningsenip apriilip qulingiluaani nassuiaatigaa.

Inuit Ataqatigiit immikkut ataatsimeersuarnissaata tungaanut siulittaasuugallartoq Aqqaluaq B. Egedep suli nalunaarutiginngilaa siulittaasussatut qinigassanngortissanerluni.

Powered by Labrador CMS