Sara Olsvig allamik suliffittaartoq
Sara Olsvig UNICEF-imi suliunnaarpoq, USA-p Kalaallillu Nunaata akornanni pissutsit pillugit Ph.D-mik ilisimatuutut allagaqartussaanini pissutigalugu.
Inuit Ataqatigiinni siulittaasuusimasoq Sara Olsvig UNICEF-ip Kalaallit Nunaanni suliniutaanut pisortatut suliunnaarpoq. Kalaallit Nunaanni Ilisimatusarnermik Siunnersuisoqatigiinnit Ph.D-mik allagaqarnissaminut aningaasaliiffigineqarsimavoq.
Olsvigip tassunga atatillugu maannakkoriaq oqaluuserineqaqisoq sammissavaa. Kalaallimmi Nunaata USA-llu 2018-imiit akoranni pissutsit qanoq ineriartorsimanerat piffissallu suliniuteqarfiusup qanoq ingerlasimanera misissorniarpaa:
- Taamatut periarfissinneqarnera nuannaarutigalugulu tulluussimaarutigaara, aggustimilu aallartinnissnnut qilanaarpunga, Sara Olsvig antropologiut ilinniarsimasoq oqarpoq.
Forsvarsakademimik suleqateqarniartoq
Sara Olsvig 2011-miit 2015-imut Inatsisartuni ilaasortaanermi sanitigut Folketingimi ilaasortaasimavoq, Isumaginninnermi, Naligiissitaanermi Inatsisinillu Atuutstsinermi Naalakkersuisuusimavoq aamma Naalakkersuisut Siulittaasuanut tullersortaasimalluni.
- Ilinniagaqarnerma politikkeriunermalu nalaani nunanut tamalaanut tunngatillugit politikkeqarneq isumannaallisaanermullu tunngassuteqartut soqutigisarisimavakka. Tamannlumi suliffissatut toqqartakkanni takuneqarsinnaavoq. Pingaartumik Folketingimi ilaasornaaninni Illersornissamut ataatsimiititaliami Nunanullu allanut ataatsimiititaliami ilaasortaasarsimavunga, aamma Issittumi Inatsisartut Ataatsimiititaliaanni siulittaasuusimavunga, Olsvig oqarpoq.
Ph.D-mik allagaqarnermini Ilisimatusarfiup Danmarkimilu Forsvarsakademip akornanni suleqatigiiittut aallarteqqammersut ikiortigisarniarpai.
UNICEF-imi suliunnaarneq
Sara Olsvigip allaaserisaqartussaanini pissutigalugu maanna suliffini qimalerpaa, 2019-imi februaarip qaammataanili UNICEF-ip Kalaallit Nunaanni suliniutaanut pisortaasivoq. UNICEF-ip Kalaallit Nunaanni allaffia naqqaniiit isumagisimallugu:
- Suliaq ingerlallualereerpoq, periusissiarlu suliarineqareerluni. Peqatigitillugu UNICEF-ip Namminersorlutillu Oqartussat suli suleqatigiinnissaat pillugu isumaqatiginninniarnerit ingerlanneqarput, suleqatigineqarsinnaasullu nutaat pitsaasullu isumaqatiginninniarfigineqarlutik. Taamaalillunga nuannaarutitgaara, Kalaallit Nunaanni meeqqat pillugit suliniutinut tunngavimmik patajaattumik ingerlatsitseqqissinnaangama, Olsvig oqarpoq.
Generalsekretæri qujamasuttoq
UNICEF Danmarkimi generalsekretærip Karen Hækkerupip Sara Olsvigip soraalernera tusatamiuk tulluussimaarlunilu ugguarpoq:
- UNICEF-imit tulluussimaarutigaarput, Ph.D-mik taamak pingaaruteqartigisumik Sara allataqarnissamut neqeroorfigineqarsimammat, peqatigitilluguli Sarap sulliseqqinnianngikkaatigut aliasuutigaarput, taanna oqarpoq, nangillunilu:
- Sara taarseruminaassaaq aamma maqaasissavarput. Qujamasuutigaarpulli Sarap Kalaallit Nunaanni UNICEF-ip allaffia ingerlalluartoq, Kalaallillu Nunaanni meeqqat qanoq pitsaanerpaamik ikiorserneqarnissaannut erseqqissumik periusissiaqartoq qimanniarmagu, aamma allaffik Saraanngitsumik allamit aqunneqarnissaa eqqarsaatigalugu, Karen Hækkerup oqarpoq.