Arctic Guardian
SAR-imik sungiusarneq: Imaani toorneeraq
Inummik imaanut nakkarsimasumik ujaasineq ajornakusoortoq paasinarsivoq - ajoraluartumillu piviusoq amerlasuutigut taamaattarpoq. Sermitsiaq.AG-p aallartitaa annaassiniarnermik sungiusarnermit annertuumit Vædderenimit oqaluttuarpoq.
Pingasunngornermi sungiusarnermi Arctic Guardianimi annanniutinik ujaasinermi arfiniliusunit tallimat nassaarineqarput. Annanniut ataaseq timmisartumit nakkartinneqarnermini pusinneqarsimavoq. Tamakku umiatsiamit nakkartinneqaraangamik qularnaarneqartaraluarput.
Suliaq ajornakusoortoq
Sisamanngornermi sungiusarneq suli ajornakusoorneruvoq. Umiarsuarmit nassiussanik usisumit angut Tasiilamit Reykjavikimut ingerlaartumi imaanut nakkarsimasoq nalunaarutigineqarpoq. Tamanna nalunaaqutaq unnuakkut marlut aamma ullaakkut arfineq-marlut akornanni pisimavoq.
Inuup sumiiffigisinnaasai assimi nalunaarsorneqarput. Sisamanik teqeqqulik takisooq titartarneqarpoq.
Ujaarleqqissaarneq
Umiarsuit sisamat qanittuaniittut titartarneqarsimasoq malillugu siullermik aallarput. Kingorna umiarsuaq kingulleq aamma apuuppoq, ujaarlerfigineqartorlu ujaarleqqissaarfigineqarpoq, umiarsuit uteqattaarnerisigut, taamaalilluni imaq tamaat ujaarleqqissaarfigineqarpoq.
Timmisartut aamma qulimiguullit ullormi tassani ujaasinermi ikiuupput.
Kisianni sungiusarneq nalunaaqutaq 18 naammassimmat, angut suli nassaarineqarsimanngilaq.
Attaveqatigiinnermi sungiusarneq
Sungiusarnerulli pingaarnersaraa attaveqatigiinnerup aamma suleqatigiinnerup sungiusarneqarnissaa, kingornalu suut pitsanngorsinnaanersut nalilersorlugu. Taamaammat inuusap nassaarineqannginnera aalajangiisuuallaanngilaq.
Kisianni tassa inuit annanniutiniittut naniuminaattarnerat piviusuusarpoq. Ukiut tamaasa inuit Nunatta imartaani tammartarnerannut aasaq manna alianartumik eqqaassutissartaqarpoq.
Aamma atuakkit:
Annaassiniarnermi ataqatigiissaarilluarnermik pisariaqarpoq
Sungiusarneq pileruttorpoq: Takornariartaat kivisimasoq
Sungiusarneq: Vædderen ajutoorfimmukartoq