Skip to main content

Saqqummersitsiveerannguaq inuusuttunik atuilluartoq

Atuakkanik saqqummersitsiviup Maanuup Atuakkiorfiata inuusuttut atuakkiaat marluk tunisarilluarpai

86-nik ukiulik Magunus Larsen, ilinniartitsisutut ilinniagalik, palasitut provstitullu soraarninngorneq, saqqummersitsiveeqqani Maanuup Atuakkiorfia ingerlataraa, ukiumullu sisamariarluni kalaallisuunik saqqummersitsisarluni. Angutillu inuusuttut atuakkiaat marluk tunisaalluarput.

Ingammik siullermeerluni atuakkiortup 28-nik ukiullip, Nukaaka F. Berthelsenip atuakkiaa "Takussunartut kusanassusersuat", tunisaalluarpoq.

Inuiaqatigiit ajornartorsiutaat eqqarsaatersuutigalugillu isummersorfigigai

- Qaammatit marluk ingerlanerini naqinneqartuni 500-ni 400-ut sinnerlugit tunisimavagut. Ullumikkut kalaallit atuakkiaat nutaat taamak sukkatigisumik tunisaasarnerat qaqutigoortunngorsimavoq, Magnus Larsen oqaluttuarpoq.

Taanna aamma oqaluttuarpoq, atuakkanik marlunnik allanik ulapputeqarnini pissutigalugu atuakkiortoq itigartingajassimallugu. Taamaattoq atuarnissaanut piffisaqaleriarami sukkasuumik atuapallassimavaa, kingornalu saqqummersissallugu neriorsupallassimallugu.

Atuagaq "Takussunartut kusanassusersuat" allaatigineqarnera naapertorlugu atuakkiortup oqaluttualiat naatsut, isummersuutit taallallu inuiaqatigiinni ajornartorsiutinik imaqartut, oqaatsinik sakkortuunik takorluuilersitsiniarnernik immersukkanik imaqarpoq.

Oqaluttualiaq nuannaarutigigaa

Atuakkap aappaa aamma tunisaalluartoq tassaavoq, "Uummataanit isaanut", taanna Apollus Inûsugtup 1985-imi inunngortup atuakkiaraa, atuakkamilu aqqanilinnik ukiulik Tobiarsi Holgu ilagalugu 'taartut nunarsuaannut' angalapput. Taakku marluullutik nunarsuarmi ajortup pissaaneranik akiuiniartussaapput.

- Oqaluttualiaq "Uummataanit isaanut" nuannaarutigeqaara, aamma meeqqanut inuusuttunullu innersuussutigisarlugu, Magnus Larsen oqarpoq, taanna siullermik isumaqarsimagaluarpoq Apollus Inûsugtoq atuakkamik allamik kalaallisuumut nutseriinnarsimanasualugu, taamaammallu aperisariaqarsimallugu. Kisiannili taamaaliorsimanngilaq.

Saaffiginnittut arlallit

Magnus Larsen atuakkiortuuvoq, 1987-imilu saqqummersitsivittaarluni, massakkullu ukiumut sisamanik saqqummersitsisarluni. Taanna oqaluttuarpoq atuakkanik saqqummersitserusuttut arlalit saaffigisarsimagaat, atuakkanilllu iluarsaassineq kukkunersiuinerlu suliassartaa annertummat angumerisinnaasani tigusarlugit.

Saqqummersitsivimmik piginnittup oqaluttuaraa, Namminersorlutik Oqartussat aningaasaliissutigisartagaat 2009-milu pissarsiarisaleramigit ukioq manna pissarserpiarsimanani, taamaammat atuakkat saqqummertut kingulliit tunisaalluarnerat qujamasuutigaa. Maanuup Atuakkiorfiata ukiut 30-it sinnerlugit ingerlanerini atuakkat 40-t missaat saqqummersissimavai.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER