Saqqumilaanngitsumik politikkikkut isumaqatigiinneq: Pisassinniaqatigiit iliuuseqaqqittut
Saqqummilaanngitsumik politikkikkut isumaqatigiinnerup Naalakkersuisut tallimanngormat annaappai. Pisassiissuteqaqqinnissamik neriorsuisoqarmat Siumukkormiut siulittaasortik tapersersoqqilerpaat, taamaallilluni qinersisoqarnissaa pinngitsoortinneqarluni.
Obs. Nal. 9.00 Allaaserisami qulequtarineqartoq qallunaatuumiit kalaallisut nutserneqarsimasoq naqqinneqarpoq, oqaaseq pisassinniaqatigiit atorneqalerluni.
Naalakkersuisut tallimanngormat ualikkut sisamat missaanni tatiginninnginnermik takutitsiffigineqarput, tassani Hans Eoksen Partii Naleqqameersoq siuttuulluni. Akitsuutinik qaffaaneq aamma qulingiluassaanik Naalakkersuisumik tunuartoqarnera pissutigalugit Kim Kielsen naalakkersuisut siulittaasoqarfianit aniseriarneqaraluarpoq.
Tamanna sioqqullugu Erik Jensen Karl-Kristian Kruselu Kielsenip aqutsineranik naammaginninnginnerminnik ersersitsipput. Siumumi ilaasortat arfinillit allat siulittaasortik naammaginagu aasaq oqariartuuteqarput. Tassa Hans Enoksen Siumumi Inatsisartunut ilaasortaatitat akornanni tatiginninngilertoqarsinnaanera pillugu periarfissarsigaluarpoq.
Saqqummilaanngitsumik politikkikkut isumaqatigiinneq
Karl-Kristian Kruseli aamma Siumumi qaleralinnik pisasseeqqinniartartut allat Kim Kielsenimik isumaqatigiissuteqarsimapput, taamaalilluni siulittaasoq ataannarsinnaanngorluni.
Inatsisartut nalunaaquttap akunnerini sisamangajalluinnarni tatiginninnginneq pillugu oqallisereersut Kim Kielsen oqaaseqarpoq. Tamatuma malitsigisaanik Karl-Kristian Krusep siulittaasuni piumaffigaa, ullormi siusinnerusukkut neriorsuutigisimasaminik uppernarsaaqqullugu, ilisimatitsissuteqaqqullugulu.
Kim Kielsen akissuteqarluni oqarpoq, angallatit seks meterit sinnerlugit angissusillit pisassaat 5.000 tonsiusut pisarineqarsimanngitsut, taakkulu aqutsiveqarfimmi Uummannami umiatsiaararsortunut immikkut qanoq qaleralittassiissutigineqarsinnaanersut maanna misissorneqalersoq.
Akerliussutsimik takutitsisut umiatsiaararsorlutilluunniit aalisartut
Innuttaasut 2000-ngajalluinnaat ullut marluk matuma siornatigut ilaatigut sukkut, viinnit, immiaaqqat, cigarettit mamakujuillu akitsuutaannik qaffaaneq pillugu Inatsisartut ataatsimiittarfiata saavani nipituuliorlutik akerliussutsimik takutitsipput. Umiatsiaararsorlutik aalisartunut pisassiiniartartut akerliussutsimik takutitsisut taakku tusaarusunngilaat. Akerlianik avannaani umiatsiaararsorlutik aalisartut tusaarusunnerusimavaat, taamaalillunilu Kim Kielsen Naalakkersuisut Siulittaasuattut issiaannarnissaa qulakkeerneqarluni.