Skip to main content

Saqqami ernumasut eqqissisarneqarput

Nalunaarusiami inerniliussani, Saqqaq qaqqat qaarsuinik nakkaasoqarsinnaaneranik tassaarsuaqartoqarsinnaaneranillu aarlerinartoqartoq pillugu, Saqqami najugaqartut ilisimatinneqarput.

Namminersorlutik Oqartussat GEUS suleqatigalugu nalunaarusiaani  Kalaallit Nunaanni sumiiffinni qaqqat qaarsuinik nakkaasoqarsinnaaneranik inerniliisoqarmat, Saqqami innuttaasut ernumatsapput. Nunaqarfiat, Saqqaq, kategori 2-mi inissinneqarsimavoq, tassa qaqqat qaarsuisa nakkaanissaanut aarlerinaateqangaatsiartumiilluni. Qaqqat qaarsuisa nakkaarinerinit Saqqaq tassaarsuarmit eqqorneqaratarsinnaavoq.

LÆS OGSÅ: Qaqqat innaasa sisoornissaat annertuumik ukunani aarlerinartoqartoq

Avannaata Kommuniani borgmester Palle Jerimiassen Saqqameeqqammerluni maanna angerlamut tikeqqammerpoq, innuttaasut nalunaarusiaq pillugu paasitikkiartorsimavai.

- Nalunaarusiaq inerniliussaa pillugu soorunami tupapput. Annilaangapput, namminneq Nuugaatsiarmiusut eqqorneqassasoralutik, nassuiaappagulli nalunaarusiaq sananeqartoq taamatut ajutoornersuaqarnerit pinnginniassammata, Palle Jerimiassen oqarpoq.

Nalunaarusiap tassaarsuaqaratarsinnaaneranut piareersarnissamik periarfissiivoq. Palle Jerimiassenilli nunaqarfimmut tikeraarnera oqariartorneralu innuttaasunut toqqissisimajunnaarsitsivoq.

- Sunilluunniit aperisinnaapput. Ajunaarnersuaqartoqannginnissaa anguniarlugu qanoq iliorniarnerluta ilisimatikkatsigit eqqissiimipput. Ernumasut eqqissisarpagut, Palle Jerimiassen oqarpoq.

Eqqarsarnissamut piffissaq

Nalunaarusiaq pingaartumik ilaqutariinnut pingasunut annertuumik kinguneqassaaq. Taakkumi illui, GEUS-ip naliliinera malillugu aarlerinartoqarfittut killiliussap ataani inissisimapput. GEUS innersuussivoq, immap tinittarnerata ulittarneratalu qeqqaniit miiterit sisamat qaangerlugit inissisimaffimmi, illuni sinittoqartassasoq.

- Nunaqarfimminni qullasinnerusumut nuussinnaanerat pillugu oqaloqatigaakka, qanorlu iliussanerlutik maanna eqqarsaatigaat, Palle Jerimiassen oqarpoq nangillunilu:  

- Saqqaq pillugu immikkut ittunik sillimaniarnermut pilersaarusiortoqassaaq. Tassaarsuaqartoqassagaluarpat, piareersimaniarluta suliniuteqarpugut, tamanna innuttaasut nuannaarutigaat, Palle Jerimiassen oqarpoq.   

Quersuaq nuunneqassaaq

Illut najugarineqartut saniatigut illut allat aarlerinartoqarsinnaasut killinganniipput. Tankeqarfik quersuarlu atsippallaami inissisimapput.

- Qanoq iliorsinnaanerput pillugu piginnittut oqaloqatigaagut. Tankit qajannaannerusumik qilersorsinnaavagut, paasiniassavarpullu quersuup nuunneqarsinnaaneranut piumanersut, Palle Jerimiassen nassuiaavoq.

Nunaqarfimmi umiatsiarineqartut immamiit qutsinnerusumi ukiitinneqartariaqarput. Umiatsiat innuttaasunit immamiit qaqinneqarsimapput, sissamiimmatali tassaarsuaqartoqaraluarpat imaanut nakkaasussaassapput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER