Sapiitsuliortuaraq Narsami kajumissaaserneqartoq
Emil Frederiksen Narsami ikuallattumik qamitsisimasutut kingusinnerusukkullu ikuallattoq alla pillugu politiinut kalerriisimasutut kajumissaarserneqarsimavoq.
Qulinik ukiulik Emil Frederiksen Narsami oqartussanit arlalinnit kajumissaaserneqarsimavoq. Emil Frederiksen sapaatip akunnerata naanerani ikuallattumik qamitsisimasutut ikuallattumillu allamik kalerriisimasutut nersornaaserneqarpoq.
Narsap qatserisartoqarfiani pisortaq Inooraq Lange Sermitsiaq.AG-mut taamatut oqaluttuarpoq:
- Emil Frederiksenip ikuallattumik siullermik qamitsisimanera ingerlaannartumik qatserisartoqarfimmut sianersimanera pissutigalugit tunissuteqarfigissallugu aalajangersimavugut.
- Aamma kina ikuallatsitsisuusimanersoq pillugu paasisaqarnissamut ikiuussimavoq. Ulluinnani qatserisarfimmi pulaartuartarpoq tamanna nuannarutigisaqaarput, Inooraq Lange oqaluttuarpoq.
Ikuallattoq Emik Frederiksenip qamissimasaa Narsap Katersugaasiviata inaaniippoq. Arfininngornerup unnukkuani illoqarfimmi ini alla ikuallatsinneqarsimavoq - innuttaasut illorisimasaat - ikuallakkami ajoqusingaatsiarsimalluni.
Emil Frederiksen iliuuseqarsimanini pissutigalugu Narsap qatserisartoqarfianit qaammartartumik 150 koruuninillu tunineqarpoq. Aamma Narsami katersugaassivimmiit atuakkamik kiisalu illoqarfimmi pinaveersaartitsinermut immikkoortortaqarfimmi arsamik refleksimillu tunineqarpoq.
- Klubbimi meeqqat tamarmik lagkagisortinneqarlutillu saftisortinneqarsimapput. Meeqqat maligassiuisutut isigivaat. Sapiitsuliortuaraavoq. Meeqqat allat pissuserissaarnissamut kajumissaartaramigit immikkullarissuuvoq. Taamaammat kajumissaaserneqartariaqartoq isumaqarpugut, Narsami pinaveersaartitsinermut immikkoortortaqarfmmi siunnersorti Bolethe Stenskov oqarpoq.
Nukappiaraq tulluussimaartoq
Pinaveersaartitsinermut siunnersortip oqaluttuaraa, Emik Frederiksen qulinik ukioqartoq aanaakkuminilu najugaqartuusoq. Aanaakkuisa oqaluttuarisimavaat, 18-inik ukioqalernissaminut qilanaartoq, taamaalilluni qatserisartunngorlunilu qineqqusaarsinnaanngussagami.
- Tunissutisigami tulluussimaaqaaq. Nukappiaraavoq unneqqarissoq, allanut pitsaanerusumik iliuuseqartarnissamik takutitsisartoq. Pinaveersaartitsisartunit pitsaasumik pinaveersaartitsisarnissaq ukkatarisimavarput, tassa oqaluttuap ajortortaannaanik isiginiartoqartannginniassammat. Neriuutigaarput Emilip iliuuserisimasai meeqqanut allanut isumassarsisitsiumaartut, Bolethe Stenskov oqarpoq.