Sapaatit akunneranut tikittartut amerlineqarput
Corona pillugu allattoqarfiup Air Greenland ilisimatippaa Danmarkimiit nunatsinnut sapaatip akunneranut tikittartut 600-nit 810-nut amerlineqassasut.
Ullumi 1. juni aallarnerfigalugu Danmarkimiit Kalaallit Nunaannut tikittartut sapaatit akunneranut 600-simagaluartut, 810-nut amerlineqassapput.
Naalakkersuisut nalunaarummi siullermi, maajimi atuuttumi ilisimatitsissutiginikuuaat majimi nunatsinnut timmisartorlutik tikittut sapaatit akunneranut amerlanerpaamik 600-sassasut.
Corona pillugu allattoqarfik nittartakkamini corona.nun.gl-imi maanna ilisimatitsivoq nalunaarut nutaaq junimi atuuttussaq malillugu, Air Greenland ilisimatinneqarsimasoq 1. juni 2021 aallarnerfigalugu angalasut 600-niit sapaatip akunneranut tikittut 810-nut amerlineqassasut.
Nalunaarut nutaaq atuuttoq 30. juni 2021 tungaanut atuutissaaq.
Danmarkimiit Kalaallit Nunaannut tikittut tikinnerminnit mattusimallutik angerlarsimaannarallaqqaartarnissaat, kiisalu tikinnermit Covid-19-imut misissorteqqaartarnissaat suli piumasaqaataavoq. Marloriarlutik akiuussutissalertereersimasut ulloq ataaseq mattusimallutik angerlarsimaannarallaqqaareernermi misissortissinnaapput. Angalasimasulli akiuussutissalerneqarsimanngitsut ulluni tallimani mattusimallutik angerlarsimaannarallaqqaartarnissaat suli piumasaqaataavoq.
Kalaallit Nunaanni Covid-19-imik tunillatsissimasut maanna arfineq-marluupput. Pituffimmi ataaseq Nuummilu arfinillit.
Islandimut aqqut matoqqavoq
Corona pillugu allattoqarfiup tunillaassuuttoqaratarsinnaanera pillugu Islandimut silaannakkut angallanneq novemberimi 2020 matugallarpaa.
Islandimut angallannerup ammaqqinnissaanut suli pilersaarutinik saqqummiussisoqanngilaq. Island maanna 40-nik tunillatsissimasoqarpoq. Akunnerni kingullerni tunillatsissimasunik nutaanik suli nassaartoqanngilaq.
Nalunaarut nutaaq malillugu immikkut ittumik angalassinissamut qinnuteqartoqarsinnaavoq, angalasut pisariaqarluinnartuuppata, imaluunniit angalaneq Kalaallit Nunaanni inuiaqatigiinnut aningaasaqarnermulluunniit iluaqutaasussatut nalilerneqarsimappat. Timmisartuutileqatigiiffiit immikkut ittumik akuersissummik piniassagunik Danmarkimi angallannermut ministeriaqarfimmut aamma Namminersorlutik Oqartussanut qinnuteqassapput.