Sapaatip akunnerata naanerani misissuisoqassasoq

Munck Gruppenimi sulisut talimmanngornermi msissorteqqissapput, sapaatillu akunnerata naanerani inuiattullu ullorsiornitsinni inuppassuit sapaatip akunnerata naanerani kingullermi tunillatsissimasinnaasut misissorneqassallutik. Corona allanngoratoq pillugu suli nutarsiaassaateqartoqanngilaq.

Nuummi tuniluuttoqarnerani corona sorleq atuunnersoq pillugu nunatta nakorsaanerata Statens Serum Institutimiit akissutisinissani suli utaqqivaa.

- Sapaatip akunnerata tulliani aatsaat akissutisissaagut, Henrik L. Hansen Sermitsiaq.AG-mut oqarpoq.

Taassuma nassuitigaa, misissugassatut tigusat misissoqqissaarneqartinnagit Danmarkimut nassiuteqqaarneqarnissaat pissutigalugu piffissaq ingerlasinnaasoq.

Utaqqinitsinni inuppassuit ulluni tulliuttuni misissorneqartussaapput. Ilaatigut Munck Gruppenimi sulisut ullumi tallimanngornermi misissorteqqittussaapput.

- Suliffeqarfimmi timmisartoqarfiliortumi sulisorpassuit aamma inuit sapaatip akunnerata naanerani kingullermi tunillatsissimasunik attaveqarsimasut misissorneqarnissaasa saniatigut, tamatta nunamut tikinnitsinnit ullut tallimassaani misissorteqqittartussaavugut, nunatsinni nakorsaaneq oqarpoq.

Misissuisarfik ammasoq

Tunillatsissimasunut attaveqarsimasunik ujaasinermut atatillugu Nuummi misissuisarfik ullumi immikkut quliniit aqqanernut ammassaaq, aamma aqangu arfininngornermi ullup-qeqqata qeqqaniit ataatsip qeqqata tungaanut ataasinngorpallu juunip 21-ani aqqanernut tanneq qulingiluaniit ullup-qeqqata tungaanut ammassalluni.

Inuit ippigisaqartut imaluunniit tunillatsissimasinnaanerminnik malugisaqartut misissortinnissaanut ammassaaq, nunatsinni nakorsaaneq ilisimatitsivoq.

Hos Munck Gruppenimi sulisut juunip sisamaani qulinganilu misissortissimasut misissorteqqittussaapput.

- Sulisut tamarmik tunillatsissimanngippata, ilimanarluinnarpoq sulisut najugaqarfianni tuniluuttoqarunnaarsimassasoq, Henrik L. Hansen oqarpoq.

Najugaqarfimmi ullut 14-it matuma siornatigullu tuniluuttoqartoq

Sulisut tamarmik misissortereersimatinnagit aamma sulisunik nutaanik najugaqarfimmut takkuttoqarsimanersoq imaluunniit pissutsinik allannguisinnaasunik allatut pisoqarsimanersoq paasisaqarfigitinnagu nunatsinni nakorsaaneq erseqqissumik oqaaseqarsinnaannginnerarpoq.

Mattusimaffik timmisartoqarfiup eqqaani sanaartorfimmiittoq sulisullu najugaqarfianniittoq juulip aappaata tungaanut atuutiinnarallassaaq, Nuummiilli aallarnissamut killilersuutit marlunngornerup juunip 22-ata tungaanut atuutissallutik.

Juunip sisamaani najugaqarfimmiittunik kingullermik tunillatsittoqarsimasoq paasineqarpoq kingullertigullu juunip 14-iani inuit marluk suliffeqarfimmut attuumassutillit tunillatsissimasut paasineqarluni.

Powered by Labrador CMS