Sapaammi unnukkut sisamat SAR-imit annaanneqartut
Oqartussat arlallit suleqatigiilluarnerisigut inuit sisamat ippassaq unnukkut sumiissusersineqarlutillu annaanneqarput, taakku masattut qiulersullu Aasianni napparsimmaviliaanneqarput.
Inersimasut marluk meeqqallu marluk qulit missaanni ukioqartut, umiatsiaaqqaminnik angalaarlutik ajornartorsiulermata, SAR-imik annaassiniarneq ippassaq unnukkut nalunaaqutaq 19.00 missaani aallartinneqartariaqarsimavoq.
- Ajornartoortoqarneq sianerfigineqarpugut. Mobilikkut sianerfigineqarput, mobililu attaviluppoq, kisianni masannerat paasivarput, pigaartut pisortaat Brian Thomsen Nuummi politiineersoq oqarpoq.
SAR-imik annaassiniarneq aallartinneqarpoq, Tele-Postimilu teknikerit Aasiaat Radiomeersut mobilip attavia suminngaanneernersoq sumiissusersineqarpoq, taamaalilluni sumiiffiat qoorunneqarniassammat.
- Qulimiguulik sumiiffimmut aallartinneqarpoq, najukkamilu angallatit ujaasinermut peqataapput, Brian Thomsen ilisimatitsivoq.
Qeqertami oqquisut
Akunnerit marluk qaangiuttut taakku inuit sisamat masallutillu qiulersut, qeqertami oqquisut nassaarineqarput.
- Qulimiguulimmut ikipput, Aasiannilu napparsimmavimmukaanneqarput, kisianni ajunngillat, Brian Thomsen ilisimatitsivoq, taassumalu Issittumi Sakkutooqarfiup, Tele-Postip, Air Greenlandip politiillu suleqatigiilluarnerisigut taakku sisamat isumannaatsumukartinneqarnerannik kinguneqarpoq.
Inuit sisamat umiatsiaaqqaminnik ajornartorsiulernerannut suna pissutaanersoq, Brian Thomsenip ilisimanngilaa.
- Ullumi ullup ingerlanerani oqaloqatigissavagut, pigaartut pisortaat oqarpoq.