Sannarluttarnerit akiorniarlugit iliuuseqartoqartoq

Sanaartornermi pitsaassutsimut tunngasoq ajornartorsiorfiuvoq. Tamanna kinguaattoornernik akisunerulernerinillu malitseqartarpoq. Ajornartorsiutit ilai naammanngitsumik aqutsisoqarneranik pissuteqartarput.

Namminersorlutik Oqartussanit ilinniartitaaneq nutaaq, ilaatigut, sanaartornermi aqutsisoqarnermik nukittunerulersitsissaaq.

- Ukiut kingulliit ingerlaneranni illuliortiternerit iluarsaassinernillu suliaqarnerit arlallit suliarineqarneranni suliat ingerlanerini naammaginanngitsumik pisoqartarneri amerliartuinnartut Namminersorlutik Oqartussat misigisarpaat. Ilaatigut suliaqarnerit ingerlaneranni kukkunernik amigaatinillu iluseqartunik pitsaassutsikkut erseqqilluinnartumik ajornartorsiuteqartoq paasineqartarpoq, tamannalu immikkut aningaasartuuteqarnerunermik kinguaattoornernillu malitseqartarpoq, Ineqarnermut Naalakkersuisoq Siverth K. Heilmann Atassut oqarpoq.

- Pitsaassutsini ajornartorsiuteqarnerit taakkua arlallit ilai sanaartornermik aqutsinerlunnermut imaluunniit aqutsinerup naammannginneranut tutsin-neqarsinnaapput. Tamatumunnga pisooqataasoq aamma tassaasinnaalluarpoq suliaqartuni sanaartornerup suliassallu ingerlasarnera inernerisaalu assigiinngitsumik paasineqartartoq. Kisianni taamatut isikkoqarneranut aamma sanatitsisup suliassamut, uppernarsaatinut aamma sanaartornerup aqunneqarneranut pisariaqartunik piumasaqaateqarnissamut piareersimannginnera pisooqataasoq ilimanarpoq. Aamma eqqarsaatigineqarsinnaavoq siunnersuisartut imaluunniit suliaqartut piffissamut, aningaasaqarnermut pitsaassutsimullu tunngatillugu sanatitsisumut naatsorsuutigisanik naammanngitsumik naapertuussaasimannginnera pisooqataasimasinnaasoq.

- Taamaalilluni nalinginnaasumik paasinninneq tassaasarpoq, suliassani aala-jangersimasuni arlalinni sanaartornermut aqutsisut tungaanniit sumiginnaaneq kinguaattoornernik, akisunerulernerinik aamma/imaluunniit illuliap naammaginanngitsumik pitsaassuseqarneranik kinguneqartartoq, Siverth K. Heilmann oqarpoq.

Pitsaassutsip ajornartorsiutaaneranik misissueqqissaarneq
Taamaattumik Statens Byggeforskningsinstitut (SBi) Namminersorlutik Oqartussat sinnerlugit pitsaassutsimik ajornartorsiutaasunik misissueqqissaarnermik suliaqarpoq. Misissuinerup taassuma inerneri SBi-p ’Kalaallit Nunaanni sanaartornermut aqutsisunik misissueqqissaarneq’ aamma ’Kalaallit Nunaanni sanaartornermut nukittunerusumik aqutsinissamut ilitsersuummi’ uppernarsarneqarput.

Misissueqqissaarnermi tikkuarneqarpoq ajornartorsiuteqartoq, illuliornermut suliassami aqutsisut assigiinngitsut piginnaaneqarneri pisariaqartut pitsanngorsarnerisigut iluarsineqarsinnaasunik.

Taamaattumik SBi aamma Byggecentrum Namminersorlutik Oqartussat peqatigalugit ulluni pingasuni ilinniartitaanerup ”Kalaallit Nunaanni sanaartornermi aqutsineq – kukkunerit amigaataasullu ikinnerulersikkit, pitsaassuseq pitsaanerulersiguk, piffissamut pilersaaruteqarnissaq aamma missingersuutit malinneqarsinnaasut qulakkiikkit!” inerisarniarlugu aallartipput.

- Naalakkersuisut qularutiginngilluinnarpaat illuliornermi kukkunerit amigaataasartullu ikinnerulernissaannut aqqutissat ilaat tassaasoq ilinniaqqinneq aammalu nunatsinni maani piginnaasaqassutsit inerisarneqarnerat. Taamaattumik Ineqarnermut Naalakkersuisoqarfiup Byggecentrum aamma SBi peqatigalugit pikkorissaanissamik neqeroorut manna inerisarpaat, neriullutillu illuliornermi suleqataasartunit atorluarneqassasoq, Siverth K. Heilmann oqarpoq.

Ilinniartitseqqiinerit Pisortatut Ilisimatusarfimmi Nuummiittumi ingerlanneqassaaq maajip 20-anit 22-at ilanngullugu.