Sandgreen: Aalisartut pissutsit naammagiunnaalerpaat
Aalisarnermut inatsisissamut suliaqarnermi aalisartut akuutinneqannginnertik iluarinngikkaat KNAPK-mit Henrik Sandgreen oqarpoq.
Aalisarnermut inatsisissamik suliaqarneq qanoq ingerlanersoq pillugu KNAPK-mi pisortaq Henrik Sandgreen aalisartunit ullut tamaasa sianerfigineqartarpoq. Naalakkersuisoqatigiinni partiit siulittaasui aamma Demokraatit siulittaasuat aalisarnermut inatsisissaq pillugu Ilulissani sapaatip akunnerata naanerani ataatsimeeqatigiipput, qanorli angusaqartoqarsimanera suli avammut nalunaarutigineqanngilaq.
- Inatsisissami suut pingaartitarissanerigut aperineqartarnikuuvugut, maannali tusarniaaffigineqarnerluunniit ajorpugut. Inatsit maanna partiinit kisimi suliarineqarniarpasippoq, tamanna naammaginanngilluinnarpoq, Henrik Sandgreen Sermitsiaq.AG-mut oqarpoq.
- Inatsisissaq inuiaqatigiinnut aalisartunullu sunniuteqartorujussuussaaq. Qanoq pisoqarnissaanik ilisimatitsisoqannginnera pakatsinartorujussuuvoq, oqarpoq.
Qinersisoqaratarsinnaanera ernumagaa
Ataatsimiititaliarsuassap qanoq isikkoqarnissaa partiinit akerleriissutaasoq, Henrik Sandgreenip ilimagaa.
- Qinersisoqaratarsinnaanera ernumagaara. Maannakkut inissisimaffigisaq naammaginanngilluinnarpoq, Henrik Sandgreen naqissusiivoq. Siumumi akerleriittoqarnera aamma ernumagaa.
- Aalisarnermut naalakkersuisup kingullertigut oqariartuutaat isumaqatiginngilagut. SIK aamma Sulisitsisut akuutinneqanngillat, tamanna naammaginanngilluinnarpoq. Tassami aalisarneq inuiaqatigiinni pingaarnersatut inissisimavoq, ajutoortoqassappat inuiaqatigiinnik eqquinerluttussaavoq, Henrik Sandgreen oqarpoq.
- Aalisarnermut seminarertitsisoqareersoq Nikkulaat Jeremiassen oqaloqatigaara, kisianni susoqarsimanersoq ilisimatinneqanngilanga. Susoqarnersoq ilisimanngilarput, Henrik Sandgreen oqarpoq.