Sermesooq
Sanaartornermut Tasiilamullu aningaasaliisoqassaaq
Skatimut akileraarut nikinnani ukiumilu qinersiffiusumi Kommuneqarfik Sermersooq sinneqartooruteqassaaq Amigartooruteqartoqarnissaalu tullinnguuppoq
Kommuneqarfik Sermersuumi sanaartorneq ingerlaqqissaaq. Aappaagumut aningaasanut missingersuut kommunalbestyrelsimit ippassaq aalajangiiffigineqarmat akuersissutigineqarpoq.
Sanaartorluartoqassaaq
Missingersuutinit 1,7 mio. koruuniusunit 240 mio. koruunit sanaartornermut atorneqassapput. Tassa missingersuutit 14 procentii.
- Inissiat, meeqqeriviit pisariaqartikkatsigit sanaartornerillu suliffinnik pilersitsisarmata sanaartugassarpassuarnik qulakkeerinissaq Kommunalbestyrelsimit isumaqatigiissutigineqarpoq, borgmester Asii Chemnitz Narup (IA) oqarpoq.
Atuaruk: Sermersuup 2017-imi annertuumik sanaartornissaq siunniuppaa
Sanaartugassalli ilai aallartinneqareerput siusinaartumik aningaasaliiffiginerisigut. Tassaallutik Nuummi talittarfissaq
Tasiilamilu inissialiat.
Atuaruk: Sermersooq innarluutilinnut inissianik pisivoq
Isumaginninnermi suliat
Nuummi ineriartorneq ingerlaannassasoq kommunalbestyrelsip naatsorsuutigimmagu sanaartornermut aningaasaliisoqarpoq. Tasiilamilu isumaginninnermut suliassat immikkut aningaasaliiffigineqarlutik.
- Nuummi inerisaasoqarnerata kingorna Nuup avataani suliassat suliarisinnaalernerinik kinguneqarpoq. Tasiilami ajornartorsiutit arlaqartut iluarsiiviginissaat piviusunngorsimanavianngikkaluarput Nuummi suliniutit arlallit aallartitavut amerlisimanngikkaluarpata, borgmester Asii Chemnitz Narup (IA) oqarpoq.
Atuaruk: Tasiilami meeqqat pillugit isumaginninnermut suliat 500 sinneqartut
Ukiumi qinersiffimmi sinneqartoortoqartoq - kingornalu amigartooruteqartoqarluni
Kommunip aningaasaqarnera 19,4 mio. koruuninik sinneqartooruteqarnissaa naatsorsuutigineqarmat aningaasaqarnerup pitsanngorsarnissaanut siunniunneqartut iluatsinneqarput. Skattimut akileraarut qaffanneqassanngitsoq, sinneqartoorutaajumaartussat 20 mio. koruuniussasut, sanaartornermut aningaasartuutit 200 mio. koruuniussasut karsillu imaarutinnginnissaa siunniunneqarlutik.
Kommunalbestyrelsimulli qinersisoqareerpat aningaasat taama amerlatigiumaassanngillat. Missingersuutinimi 171.000 koruunit 2018-mi amigartoorutaassapput. 14 mio. koruunillu 2019-mi amigartoorutaassasut. Sanaartorneerujussuarlu annikillissasoq aamma missingersorneqarpoq, aningaasaliissutaasartummi 30 - 35 mio. koruuninik annikillissasut naatsorsuutigineqarmat. Aningaasaliissutaasartulli 200 mio. koruunik suli sinneqassallutik.