Skip to main content

Sanaartornermik ineriartortitsineq AP Møller-ip tapiiffigaa

DTU-p Rambøll aamma Tegnestuen Vandkunsten suleqatigalugit sanaartornermi ileqqoq nutaaq, issittumi pissutsinut immikkut ittunut naleqqussagaq, ineriartortissavaat. A.P. Møllerske Støttefond-ip suliniut 10 millioner koruuninik tapiissuteqarfigaa

Danmarks Tekniske Universitet, Rambøll aamma Tegnestuen Vandkunsten ataatsimoorlutik 10 millioner koruuninik aningaasaliiffigineqarput suliniummut anguniagalimmut, tassuuna Issittumi sanaartornermi ileqqoq nutaarluinnaq ineriartortinneqassalluni.  Suliniutikkut anguniarneqarpoq sanaartoriaatsimik, issuttumi pissutsinut immikkut ittunut naleqqussakkamik, ineriartortitsinissaq. Taamatut tusagassiorfinnut nalunaarutikkut allappoq Danmarks Tekniske Universitet.

– Kalaallit Nunaanni sanaartorfigissaaneq akisuujuvoq, qaarsut tikikkuminaatsuupput, aput akornutaasartorujussuuvoq, sumiiffiit imminnut ungasissorujussuupput piffissarlu sanaartorfik sivikitsuinnaalluni. Akerlianilli avatangiisit, isikkiviit qaamanerillu nalissaqanngillat. Aamma taartumiluunniit. Ineqarnermut aaqqiissutissarsiorniarpugut anguniagaqarluartumik pissutsinut sualuttorujussuarnut naleqqussakkamik, silap pissusia eqqarsaatigalugu sanaartornermilu teknikkikkut aaqqiissutissat atorsinnaalluartut avatangiisillu peqassusaat atorlugit, tusagassiorfinnut nalunaarut malillugu Jens Thomas Arnfred, illussanik titartaasartuusoq aammalu Tegnestuen Vandkunsten-imik piginneqataasoq, oqarpoq.

Issittumi sanaartornermi ileqqoq allanngortillugu

Ny Arktisk Byggeskik-imi tunngaviusumik siunertaavoq sanaartugassat immikkoortuinik oqitsunik, ilusilersoriikkanik ikkussoruminartunik atoqqissinnaasunillu ineriartortitsinissaq, tamakkualu ikkussorneqarlutillu piiarneqarsinnaassapput kivitsissutit angisuut oqimaatsullu atornagit.

– Manna tikillugu assersuutigalugu Kalaallit Nunaanni sanaartoriaaseq europamiut sanaartoriaasaannut sanaartukkanullu atortuinut, kiannerusumi pissarsiarineqarasinnaasunut, assingusorujussuuvoq. Atortussat, assartorlugit akisusartut, pissutigalugu tamakkua issittumi pissarsiassaanngimmata. Assersuutigalugu qisuit kalaallit illuini atorneqarajupput. Den A.P. Møllerske Støttefondimit aningaasaliissutit suliniutip ineriartorteqqinnissaanut periarfissiipput, Nuummilu misiliummik illuliaq sanasinnaalerparput, sanaartornermi teknikkikkut, isikkumigut illutullu atorsinnaassutsimigut Issittumi sanaartornermik ileqqumik allanngortitsisinnaasoq, Niels Andersen, DTU-mi issittumut tunngasunut centerimi (Polar DTU) pisortaq, oqarpoq.

Vandkunsten-imi laboratoria DTU-milu misileraaviit

Issittumi sanaartornermi ileqqumik nutaarluinnarmik ineriartortitsinissamut sanaartornermi teknikkikkut aaqqiissutissat nutaarluinnaat pisariaqarput. Aaqqiissutissat tamakkua laboratoriami sunik tamanik samminniffiusumi NABLAB-imi ineriartortinneqarlutillu misiligarneqartassapput. Laboratoria Københavnimi Holmenimi Tegnestuen Vandkunsten-imiippoq, sanaartoriaatsimilu immikkoortut ataasiakkaat ikkussugassartaallu Lyngby-mi DTU-p campus-iani misiligarneqartassapput. Tamatuma kingorna anguniagaavoq sanaartornermi teknikkikkut aaqqiissutissat misiligarneqarneqassasut kingornalu Kalaallit Nunaanni atugaalersinneqassasut, piffissaq ungasinnerusoq isigalugu nutaamik sanaartornermi ileqqunut unammillertunngorlugit. Kalaallit Nunaanni Danmarkimilu.

Ny Arktisk Byggeskik suliniummik ineriartortitseqqiineruvoq, suliniullu taanna Tegnestuen Vandkunsten-ip aammalu illussanik titartaasarfiit Qarsup aamma Clement & Carlsen-ip (Nuummeersut), 2012-imi Venedigimi Illussanik titartaanermik takutitsinersuarmi Arkitektbiennalen-imi Possible Greenland-imik taaguutilimmi saqqummersippaat, tusagassiorfinnut nalunaarummi allassimavoq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER