aatsitassat
Sammisaq oqallisaanerpaasoq Inatsisartuni oqaluuserineqartoq
Sammisaq naalakkersuisooqatigiit aamma illuatungiliuttut isumaqatigiissutiginngilluinnagaat, tassa uranimik piiaaneq, Inatsisartuni pingasunngornermi oqaluuserineqarpoq
Kalaallit Nunaanni aatsitassarsiornermi piiakkat pingaarnerit saniatigut piiakkat sinneranik tunisassiassanik radioaktiviusinnaasunik takussutissartalinnik imaluunniit akulinnik atorluarneqarsinnaaneranut atatillugu isumasiuilluni qummut qaffasinnerpaaffissaliisoqarnissaanik 0,05%-imut innuttaasunik taasititsisoqassava?
Naalakkersuisut paasititsiniaanernik illuinnaasiunngitsunik aallartitsinissamut pilersaaruteqarpat?
Taakku aalajangiiffissatut siunnersuutit, Inatsisartut ullumikkut pingasunngornermi oqaluuseraat.
Oqaluuserisassaq siulleq Steen Lyngemit (A) siunnersuutaavoq, aappaallu Inuit Ataqatigiinneerluni.
Atuaruk: GME annertuumik taarsiiffigeqqusinnaava?
Imminnut ungasittut
Partiillu akornanni sivisuumik oqallittoqassamaarpoq.
Naalakkersuisooqatigiit Siumut, Demokraatit aamma Atassut ilisimaneqareersutut uranimik piiaanissamut akuersaartuupput, illuatungiliuttullu Inuit Ataqatigiit kiisalu Partii Naleraq naaggaarluinnarput.
Inatsisartuni oktoberip 23-ni taasititsineq tamat oqartussaaqataaneranik toqqammaveqanngitsumik taasititsisoqarneranik tunngavilersuut tusarsaajuarpoq.
Atuaruk: Demokraatit naqissusiipput: Urani pillugu innuttaasunik taasisitsisoqassanngilaq
Inuit Ataqatigiit siunnersuutaat maannakkut akuerineqassappat tupaallannartuussaaq, tassami illuatungiuliuttut 2013-imitut uranisiunnginnissamut amerlanerussuteqalersitsisinnaanngillat.
Inatsisartuni oqallinneq maanna ingerlavoq.
Oqallinneq KNR-TV-mi uani malinnaaffigiuk