Salome Narsarmiu arfininngormat 90-iliivoq

Narsami utoqqaat illuata Luuvikasiup najugaqartut ilaat arfininngormat nalliuttorsiutigaa, Salome Frederiksen, 90-inik ukioqalerpoq, tamannalu kaffisortitsisoqarneranik, erinarsoqatigiittoqarneranik aamma illoqarfimmiunit tunissutisiarpassuaqarluni pivoq.

Salome Frederiksen panini Kathrine Madsen aamma ernini Jonathan Salomonsen peqatigalugit.

Nuannannermi qitiusoq, Salome Frederiksen, qitornaminit pingasuusunit marlunnit pulaarneqartoq, erinarsoqatigiinnit erinarsorfigineqarami attortilaarluni qullilivoq.

Kaffisortitsisoqarnerani kommunalbestyrelsimut ilaasortap Karla E. Bisgaardip (S) Qaqortumi borgmesterimit inuulluaqqusissummik apuussivoq, kiisalu Kommune Kujallermit tunissummik.

Salome Frederiksenip qitornai marluk, pania Kathrine Madsen aamma ernera Jonathan Salomonsen, anaanartik Narsarmiuisoq oqaluttuarput, inuunilu tamaat illoqarfimmi najugaqarsimasoq. KGH-p raajanik tunisassiorfiani sulisarsimavoq. Raajanik suliaqarnani tunisassiorfiup kantiinaani sulisuusimalluni. Salomep uikua, Frederik Frederiksen, umiarsualivimmi aamma KGH-mi sulisuusimavoq.

Nuna tamakkerlugu ilisarisimaneqalertoq

Salome Frederiksen, ukioqqortusigaluarluni peqqippasittoq, ukiut tallimat matuma siorna utoqqaat illuata aggersaanermut atortui ajortinneranni najugaqartut siggartaammik tunineqarneranni nuna tamakkerlugu ilisarisimaneqalerpoq.

Aviisip Sermitsiap tunuani utoqqaat siggartaammik taamani nuannisartarnerat pillugu oqaluttuarpoq, minnerunngitsumik fjernsynimi arsaattunik isiginnaartillutik sulisut utikallutik arpattariaqartarsimammata.

Powered by Labrador CMS