Salling: RG-p unammillernera naapertuilluanngilaq

Roayl Greenland Nunatta Karsianik tunuliaqutaqarluni naapertuilluanngitsumik unammillerpoq. Taamatut isumaqarpoq Polar Seafoodimi pisortaaneq Jens Salling, Royal Greenland iliuusaata inuiaqatigiinnut kinguneqaatigisinnaasaanik annilaanngateqartoq.

Coronap ajornartorsiortitsinera takornariartitsisartuinnanut sakkortuumik eqquinngilaq. Kalaallit Nunaata isaatitsissutitut annersaat taamalu pingaarnersaat, aalisarneq, nunarsuarmi akigititat appariartornerannit aamma eqqungaavoq, tamatumalu malitsigisaanik Kalaallit Nunaanni namminersortut suliffeqarfiutaasa annersaannik piginneqataasoq mianersoqqussuteqarpoq, Namminersorlutillu Oqartussat suliffeqarfiutaannut Royal Greenlandimut toqqaannartumik isornartorsiuilluni.

Royal Greenlandimi pisortaanerup Mikael Thinghuusip oqaatigisimavaa, maanna ajornartorsiornerup nalaani Royal Greenland aalisanermi aalisakkerisivinnilu suliffiit attatiinnarneqarnissaat qulakkeerniarlugu qanorluunniit iliuuseqarniarluni. Piumasaqartut allanngornerat pissutigiinnarlugu, tunisassiaminik akikinnerusumik tunisaqassangaluaruniluunniit. Neriniartarfinnut, kantiinanut il. il. nerisassanik tuniniaasarneq qangamut sanilliullugu uningajavissimavoq, tassa niuernermi tunngaviit affangajalluinnaat taakkuummata.

Jens Sallingip maanna coronap atuunnerani Royal Greenlandip periusia paasisinnaanngilaa, oqaatigalugulu Polar Seafoodi suliffeqarfiillu namminersortut allat Nunatta Karsianit maanna toqqaannartumik unammillerneqartut.

- Paasivarpummi, Aningaasaqarnermut Naalakkerssuisup, ilaatigut Royal Greenlandi taperserniarlugu 2,5 mia. koruuninik taarsigassarsitinniaraa, taamaalillu RHG-p annaasassai Nunatta Karsianit matussuseneqartussanngorlugit. Taama ittumik uagut karsiuteqanngilagut. Uangut aningaasaativut suliffeqarfimmiipput, akisussaassuseqanngitsumillu ingerlatsineq pissutigalugu suliffeqarfimmik annaassiniarnissamut aningaasaateqarata,Jens Salling, suliffeqarfiup 2019-imut naatsorsuutiminik kusanarluinnartumik, akileraarutit suli peernagit 327 millioner koruuninik angusaqarsimaneranik takutitsisumik saqqummiussereerluni oqarpoq.

- Ajutoortoqassappat, mianersortumik tunngaveqarluni ingerlatsineq taama ittoq atuutiinnartariaqarpoq. Aalisartummi, Polar Seafoodip pisiniarfinni akigititanut malinnaaniarluni, tunisinermi akigititaminik appaanera paasisinnaavaat. KNAPK amma taamatut nipilimmik nalunaaruteqarnikuuvoq, Jens Salling erseqqissaavoq.

Piffissamut qanittuinnarmut aaqqiissut

- Aalisartut Royal Greenlandip nalunaarutaata piffisaq ungasinnerusoq eqqarsaatigalugu qanoq kinguneqarsinnaanera ernummatigivaat, pisortaanertut misilittagartooq, Anders Brønsiugaluaq peqatigalugu suliffeqarfissuarmik to milliarder koruunit pallillugit nammineq aningaasaateqalersimasumik pilersitsisimasoq oqarpoq.

Jens Sallingip saqqummiunniagaa tassaavoq, Royal Greenlandip isaatitsinissamut sanilliullugu suliffinnik attassiniarnera, aalisarneq naggataatigullu inuiaqatigiit aningaasaqarnerat eqqarsaatigalugit piffissamut qanittuinnarmut aaqqiissutaasoq.

- Royal Greenland piffissami sivikitsuinnarmi taamatut ingerlasinnaavoq. Royal Greenlandip nunarsuarmi akigititanut malinnaaniartariaqarnerminik oqaasia uppernarpianngilaq, tassami uaguungatta Kalaallillu Nunaanni aalisarnermik suliaqartut allat, nunarsuarmi assersuutigalugu kinguppannik niuertut, Jens Salling oqarpoq.

Polar Seafoodip tunisinermi akigititanik appaasimavoq, kinguppaat kiilumut 3 koruuninik, saattuat kiilumut 8 koruuninik saarulliillu kiilumut 2,5 koruuninik apparsimavai, atuisut akigititaasa appariartornerannut niuernermi tunngavigisaq naleqqussaaffiginiarlugu.

Royal Greenland akikinaarititsiniarsarisoq

- Royal Greenland niuerfimmi akikinaarititsiniarsarivoq akigititanillu qaffaasarluni, piumaneqartunik tunisassiornini naleqqussarsinnaannginnamiuk. Namminersorlutik Oqartussat ingerlatseqatigiiffiutaata, assersuutigalugu kinguppannut saattuanullu akigititat qaffasitsinniarsarivai, Jens Salling erseqqissaavoq, assersuutitullu oqaatigalugu, pisiniarfiit arlallit Polar Seafood akigititatigut tatisarsimagaat, tamannalu pisarsimasoq, ukiumi pisiniarfiit aalisakkanit tunisassianik 15 procentimik akikinnerusumik pisitinneqartarsimanerisa ukiup ataatsip qaangiunnerani.

Polar Seafoodip toqqorsiveqarnera suli ilungersunartorsiortinneqalinngilaq.

- Niuernermi nalinginnaasumik atugassarititaasut malillugit suli ingerlatsivutu, soorunami ingerlatsinerput naleqqussartarlugu. Taamaalillut kilisaat ataaseq suli piffissaanngikkaluartoq amutsivimmut qaqinniarlugu aalajangersimavugut, suiffissaqartitsinerlu attatiinnarniarlugu kinguppannik aalisakkerivinni qalipaajaatitsinerusalersimalluta, pisortaaneq ilisimatitsivoq.

Suliassaq oqittuinnaanngittoq

Jens Sallingip aalisarfiunerpaaffiusartoq nallerneqarpat, suliffissuarmi suliassaqartitsineq akornuserneqarsimassanngitsoq oqaatigisinnaanngilaa.

- Aningaasaqarnikkut ukioq manna qanoq inississanerluta naluara. Qitiutillugu sammisarput tassaavoq, ingerlatsinittat pitsaanerulersinneqarnissaa naleqqussarneqarnissaalu. Suliffeqarfilli Nunatta Karsianik tunuliaqutaqarluni nammineq isummani malillugu ingerlatillugu naammaginartumik aningaasaqarnissap qulakkeerneqarnissaanik soqutiginninngittumik ingerlatillugu, niuergimmik ingerlatsiniarneq oqittuinnaanngilaq, Jens Salling oqarpoq.

Powered by Labrador CMS