Salaatit nutaat Paamiuneersut

Kalaallit Nunaanni Brugseni aamma Arctic Greens salaatinik, Paamiuni naatitanik tunisisarnissamut isumaqatigiissusiorsimapput, niuerniarfik ilisimatitsivoq.

Arctic Greens ullumikkut 300 kvadratmeterinik annertussusilimmik tunisassiorfeqarpoq, siunissamilu pilersaarutigaat Nuummi tunisassiorfimmik pilersitsiniarlutik.

- Sapaatit akunneri tamaasa salaatit 200-t katersorsinnaasarpagut. Paamiuni Brugsenip pisisartui salaatinik nutaarluinnarnik pisisinnaapput – katersorneqarneriniit minutsialuit qaangiunnerini. Ukioq kaajallallugu salaatinik tunniussisinnaavugut, salaatillu taakku uumasuarartaqaratik, Michael Lynge Heretis Arctic Greens-meersoq oqarpoq.

Nuummut
- Neriuppugut suliamut pilersaarut Nuummut aamma siaruartersinnaassallugu. Maannakkut misissorparput tunisassiorfimmik Nuummi pilersitsiniarnermik periarfissat, aammattaaq cherry tomatinik misiliilluta aallartitsiniarpugut, ilanngullugu oqaatigaa.

Periaaseq atorneqartartoq taaneqartarpoq hydroponic, tassaalluni salaatit issumik atuinani naatinneqartarlutik. Taamaalilluni naatitat naasupilunnit, uumasuaqqanit nappaatinillu eqqugaasarnatik.

- Salaatit issumi naatinneqaratik imermi naatinneqartarput. Maannakkullu nammineq atugassatut misiliutigaarput qeqqussat atortugit salaatit inuussutissaannik pilersornissaat, taakkulu aamma naalluarpaseqaat. Iluatsilluassappat Danmarkimiit salaatiliassat taamaallaat pisalissavagut, imeq inuussutissiassartaalu nunatsinneersuussallutik. Taamaalilluta isumannaassavarput projekti una økologioskimik ingerlanneqassasoq, Michael Lynge Heretis oqarpoq.

Suliffiit amerlanerit
Nunatsinni tunisassiornerup kingunerissavaa, Kalaallit Nunaanni Brugseni aamma Arctic Greens nunanit allanit nioqqutissanik eqqussineq annikilliliiffigissavat, suliffeqarfinnillu amerlanerusunik pilersitseqataallutik.

'Nerisassat Pinngortitameersut' Sermitsiaq.AG-mi aggustimi sammisatut qulequtarineqarpoq. Allaaserisat tamaasa uani atuakkit