Skip to main content

Sakkutuut timmisartuat Arctic Winter Gamesimi sisoraatinik

Issittumi Sakkutooqarfiup issittumi unammiuaarnerit timmisartumik, siniffinnik aamma nerisassanik taperserpaat

Arctic Winter Games 2016-imut peqataasussat 1.250-init ikinnerunngitsut Kangerlussuarmiit Nuummut arfininngorpat ingerlanneqassapput. Nalunaaquttap akunnerisa 21-t ingerlaneranni uterlugulu timmisartuussinerit 34-t pineqarput, akuusullu tamarmik aammalumi Kalaallit Nunaata tamakkerluni neriuutigaat silap saamanerata arfininngorpat najussagaatigut.  

Hercules
Peqataasussat 1.250-t ullup unnuallu ataatsip ingerlanera ataallugu ingerlanneqarsinnaasa saniatigut atortussarpassuit Kangerlussuarmiit assartuunneqassapput, Issittumi Sakkutooqarfik sakkutuut timmisartorsuat assartuut C-130 Hercules atorlugu tamatumani ikiuunniarpoq, ilaatigut sisoraatit, aputisiutit aamma snowboardit sapaammi ullaakkut tikiutissallugit.

Tallimanngornermi unammiuaarnerit naammassereernerini timmisartorsuup assartuutip atortut tamaasa Kangerlussuarmut oqqutissavai. 

Atuaruk: Issittumi Sakkutuut AWG2016-mut tapersersuisunngorpoq

Nerisassat 1.000-t
Tamaat isigalugu Issittumi Sakkutooqarfik angallassinerup tungaatigut pingaarutilimmik inissisimavoq, aamma Kangerlussuarmi takuneqarsimanngisaannartumik amerlassusilinnik ingerlaqqissinnaajunnaartoqassagaluarpat piareersimanissamut ikiuulluni. 

Tassunga tunngatillugu siniffiit 250-t, tippit kiisalu nerisassat 1.000-t sinnerlugit amerlassusilinnut naammattusaakkat Issittumi Sakkutooqarfiup Kangerlussuarmut assartorpai. 

Pilersaarusiorneq
Tamatuma saniatigut Issittumi Sakkutooqarfik ukiut kingulliit marluk ingerlanerini sulisutigut  ikiuuppoq, ilaatigut pilersaarusiornermik, angallannikkut ataqatigiissaarinermik, isumannaallisaanermik aamma upalungaarsimanissamut pilersaarutinik suliaqarnissamut immikkut ilisimasalinnik sulisunik atugassaqartitsilluni.

- Issittumi Sakkutooqarfiup Arctic Winter Gamesimut akuusinnaanera nuannerpoq, piginnaasaallu pitsaasut inuppalaartumik Arctic Winter Gamesitut ittumik aaqqissuussinermut atorneqarput. Taakku Namminersorlutik Oqartussani upalungaarsimanissamut immikkoortortaq aamma sakkutooqarfik, kiisalu kajumissutsiminnik sulisut peqatigiillutik AWG2016-ip aqutsisoqarfia, aaqqissuussinerup tamarmi nakkutigineqarneranik sulialik, aqussavaat, pisortaq Maliina Abelsen tusagassiuutinut nalunaarummi paasissutissiivoq.

Kajumissutsiminnik suleqataasut
Issittumi Sakkutooqarfiup Nuummi Kangerlussuarmilu sulisuisa 45-t missaanniittut ilaat 20-nit amerlanerusut Arctic Winter Gamesip ingerlanneqarnissaanut kajumissutsiminnik ikiuullutik sulissapput. 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER