Sakkutuut imarsiortut cigaretsinik imigassamillu akiliillutik qilalukkat qernertat tuugaavinik pisiaqarsimasut
Lauge Kochimi sakkutuut imarsiortut marluk sakkutooqarnermi pillaasarnermut inatsimmik unioqqutitsisimasutut pineqaatissinneqarsimapput. KNR taamatut allappoq
Sakkutuut imarsiortut tupanik imigassamillu akiliillutik qilalukkat qernertat tuugaavinik pisiaqartarsimapput.
Sakkutuut imarsiortut qaffasissumik inissisimasut Kalaallit Nunaanni inerteqqutaasumik imigassamik tunisaqartarsimanertik aamma umimmanniartarsimanertik pissutigalugu akiliisussanngortinneqarsimapput.
Umiarsuaq alapernaarsuut 2018-imi aasakkut Tunup imartaaniimmat ileqqorissaarnissamut malittarisassat sakkutooqarnermilu pillaasarnermut inatsit soqutigineqarsimanngilaq.
Tassani inuttat marluk umiarsuup kioskiani cigretsinik kartoninik sisamanik imigaasamillu ataatsimik pisisimapput. Tamatuma kingorna pisiatik Ittoqqortoormiini qilalukkat qernertat tuugaavinik pingasunik pisiaqarnerminnut akiliutigisimavaat.
Kalaallit Nunaata Radioa, KNR allappoq.
Ittoqqortoormiini imigassanik kimittuunik tuniniaasoqaqqusaanngilaq.
Angutit taakku marluk – sakkutuut naalagaat teknikkikkullu atorissaarutinut akisussaasutut naalagaq aalisarnermik nakkutilliissummi Lauge Kochimi angalaqataasimapput. Umiarsuarmi Lauge Kochitut ittumi nunat assigiinngitsut akornanni imaannarmiinnermi nioqqutissanik akitsuuteqanngitsumik pisisoqarsinnaavoq.
Taakku umiarsuup kioskiani imigassamik cigarettinillu kartonnginik sisamanik, kartongimut 120 koruunit missaannik akilimmik pisiaqarsimapput. Pisiatik taakku qilalukkat tuugaavinik pingasunik pisissutigisimavaat, tuugaat angissusaat isikkuallu apeqqutaallutik tusindilikkaanik iluanaarutigineqarsinnaapput.
Illersornissaqarfiup unnerluussisussaatitaasuata, Auditørkorpsetip taakku inuit marluk sakkutooqarnermi pillaasarnermut inatsimmik pisussaaffimminnik ilaginnaasimasutut akiligassissimavai.
Sakkutuut naalgaat 9000 koruuninik akiligassinneqarsimasoq, teknikkikkut atorissaarutinut akisussaasutut naalagaq 5000 koruuninik akiligassinneqarsimavoq.
Sakkutuut naagalaat tupamik imigassanillu tunisaqarnermi saniatigut Kalaallit Nunaanni nunami eqqissisimatitami piniarfioqqusaanngitsumilu umimmamik pisaqarsimavoq.
Umimmak kingusinnerusukkut umiarsuarmi nerineqarsimavoq. Inerteqqutaasumik piniarsimanermut pineqaatissiissut 9000 koruuninik akiligassiissummut ilaatinneqarpoq.
Auditør Claus Risbjerg, inuttat pillugit suliamik ingerlatsisuusimavoq.
Kalaallit Nunaata imartaani umiarsuit alapernaarsuutit angalasut pillugit suliaqartarneq qaqutigoortuuvoq, taanna KNR-mut oqaluttuarpoq.
- Suliaq ilungersunartorujussuartut isigaarput, pissutigalugu tamanna naalagaaffeqatigiinnut isumaqartorujussuummat, taamaammat suliaq pingaarnersiuinermi salliutilluinnarparput, Claus Risbjerg oqarpoq.
Umiarsuup naalagarisaa aamma akiligassinneqarsimavoq. Umiarsuarmi naalagaq umiarsuarmi akisussaasuni qaffasinnerpaavoq, taanna umimmammik unioqqutitsisumik toqutsisoqarnera pillugu kalaallit oqartussaasuinut nalunaaruteqarsimannginnini pissutigalugu 6.000 koruuninik akiligassinneqarsimavoq.
Tamatuma saniatigut umiarsuarmi inuttanut aalisarnissamut akuersissuteqanngitsunut aalisarsinnaatitsisimanerminut aamma pillarneqarsimavoq.
Taakku pingasuullutik akiligassinneqarnertik akuerisimavaat.