Sakkutuujusussaanermit eqqumiitsuliornerup silarsuaanut: Kalaaleq tusaamasanngortoq
Aka Niviâna Mørch Pedersen tv-iikkut nangeqattaartuliami nutaami ”True Detective”-mi inuttaavoq, tassanilu ilaatigut Hollywoodimi isiginnaartitsisartoq tusaamasaq inuttaaqatigalugu. Eqqumiitsuliortoq AG-mit alapernaaserfigaarput, inuk aappalaartunik nujalik kinaanersoq paasiniarlugu.
28-nik ukiulik Aka Niviâna Mørch Pedersen TV-iikkut nangeqattaartuliami ”True Detective”-mi HBO-mi Amerikamiut pinerluttulersaarutaanni nutaami pingaarnertut inuttat ilaattut inuttaavoq. Ukioq manna takuteqqaarneqassaaq filmiliortullu pisut ilaat Islandimiittut immiullugit naammasseqqammerpaat.
Aviisi AG taama allappoq.
- Akaarnarpoq annilaanganalaarlunilu. Aammali pissanganaqaluni, immikkut pisinnaatitaaffiulluni annertooq. Takorluugaq. Qujamasoqaanga. Aammali annertuumik tatineqaataasoq malugisinnaallugu, inuttaaffini pillugu Aka Niviâna Mørch Pedersen oqaluttuarpoq.
Upernavimmi inunngorpoq inunngutsiaannarlunilu meerarsianngorsimalluni. Angajoqqaarsiani anaanaartorlugillu ataataartorpai. Ilaqutariit Sisimiuni Uummannamilu najugaqarsimapput. Aka Niviâna Mørch Pedersenili inuunermi annersaa Danmarkimi najugaqarsimavoq. Angutaa danskiuvoq anaanaalu ullumikkut toqoreersimasoq Upernavimmeersuuvoq. Sulisaqaat, tamatigulli ilaqutariittut peqatigiinnissaminnut piffissaqartarlutik. Tamanna pingaartuuvoq. Ilaqutariittut piffissaq. Aka Niviâna Mørch Pedersenilu sunngiffimmini nuannarisaqarpoq sammissallugu nuannareqisaminik.
- Meeraallunga atuartaqaanga, ikinnguterpassuaqarlunga, kisimiinnerli atuarnerlu nuannareqaakka. Pingasunik ukioqarlunga atuartalerpunga. Uummannami meeqqerivimmi allagarsiivimmiittut paasisinnaavakka. Soorlu perorsaasut pilersaarutaat piffissallu suliffigisat nikinnissaat, oqaluttuarpoq.
Angutaata meeqqerivimmi aagaangagu ima pisoqarajuttarpoq nassaarisinnaanagu. Issiasarpoq meeraaqqanullu atuffasssilluni.
- Ataatama atuffattaqaanga mikisuaraallungali. Isigiarsulermat uanga atuffassinnaavara. Ullut tamaasa atuffattarpaanga.
Aviisimi AG-mi atuarnerusinnaavutit. Aviisi uani pissarsiarisinnaavat:
