Sakkutuujusimasut Danmarkimeersut Nuummut tikeraartut
Sakkutuujusimasut Kalaallit Nunaanneersut Danmarkimeersullu sakkutuut Danmarkimit aallartitat pillugit pisortatigoortumik erfalasuliissapput.
Sakkutuujusimasut 100-t missaaniittut Kalaallit Nunaanni najugaqartut sakkutuut Danmarkimiit aallartitaasut pillugit septemberip tallimaani pisortatigoortumik erfalasuliinermi sakkutuujusimasunik Danmarkimeersunit ilalersorneqassapput.
Veteranprojekt Grønland, ullormi pisortatigoortumik erfalasoqartitsisarnermi Kalaallit Nunaannut ukiut aappassaat tikeraassapput. Suliniut Høveltemi KFUM Soldaterrekreationimit aamma Allerød kommunemi nammineq kajumissutsiminnik suliaqartunit suleqatigiiffigineqarpoq. Suliniummi anguniarneqarpoq Kalaallit Nunaanniit sakkutuutut aallartitaasimasut tapersersorneqarnissaat peqatiminnillu attaveqaqateqalernissaat, kiisalu Høveltemi KFUM soldaterrekreationimi ilaasortaasut tapersersorneqarnissaat.
- 2018-imi pisortatigoortumik erfalasoqarnerup ulluani Nuummiinnerput taamatullu sakkutuujusimasunik maani najugaqartunik naapitsinerput misigisaq nuannersuuvoq, suliniutigisatsinnilu qitiulluinnarluni. 2018-imi suliarisimasarput nangeqqillugu Kalaallit Nunaannut ukioq manna angalaqqissaagut.
Veteranprojekt Grønland sakkutuujusimasut Kalaallit Nunaanni najugaqartut tamaasa attaveqaqatigiilernissamut qaaqquai – naapinnissaq Nuummi Sømandshjemmemi septemberip tallimaani 19:30 pissaaq.
- Kikkulluunniit aallartitaanikuusimasut tikilluaqqusaapput, aamma politiit, annaassiniartartut peqqinnissaqarfimmilu sulisut aallartitaanikuusimasut ilaasinnaallutik, suliniummi aqutsisoq Gerth Sloth Berthelsen, Nuummi aamma ilaqutaqartuusoq, tusagassiutinut nalunaaruteqarluni allappoq.
