Sakkutuujusimanera pingaaruteqarsimaqaaq
Kalaaleq Johnny Mieth sakkutuuni ilinniagaqarsimavoq. Ullumikkut ingerlatsivimmi millionilinnik kaaviiaartitsisartumi, 100-ungajannillu sulisulimmi pisortaavoq piginneqataallunilu
Sakkutuuni ilinniagaqarneq inuunermi iluaqutaasorujussuuvoq periarfissarpassuarnillu kisissaanngitsunik ammaalluni. Taamatut oqarpoq 46-inik ukiulik Narsami inunngorsimasoq Johnny Mieth, aviisimut Sermitsiamut taama oqaluttuarpoq.
Taanna kalaallit siulliit ilagaat sakkutuuni imarsiortuni sakkutuujusimasut – tamannalu inuunermini iluaqutigilluarpaa.
Ukiuni 14-ini sakkutuuni imarsiortuni sulereerluni sakkutuut akiligaannik bygningskonstruktøritut ilinniagaqarpoq, ullumikkullu Aalborgip kujataani Hornumimi sanaartornermik entreprenøritullu ingerltasivimmi HME-mi, 100-ungajannik sulisulimmi, piginneqataavoq pisortaallunilu. Ingerlatsivik siorna 140 millioner koruuninik kaaviiaartitaqarpoq.
Taassuma tupigusuutigaa kalaallit sakkutuunngorniarsinnaalernissaat Naalakkersuisut unitsissimammassuk, taamaasillutillu kalaallit inuusuttut sakkutuuni ilinniagaqarsinnaanerannik mattullugit.
Naalakkersuisut paasisinnaanngilai
– Paasisinnaanngilluinnarpara Naalakkersuisut sooq taamaasiornersut. Ilinniagaqarnera sakkutuunilu sulisimanera uannut pingaaruteqarsimaqaat. Qularutiginngilara aamma kalaallit allat sakkutuuni ilinniagaqarneq iluaqutigissaqigaat, taamaasillutillu inuiaat kalaallit siunissaat qulakkeerlugu, Johnny Mieth Sermitsiamut oqarpoq.
Johnny Mieth 1975-imi inunngorpoq Narsamilu peroriartorsimalluni, kalaallimik anaanaqarluni qallunaamillu ataataqarluni.
– Ataataga isumaqarsimavoq Narsami uninngaannassanngitsunga, ilinniagaqassasungali. Nammineq sakkutuuni imarsiortuniissimagami siunnersorpaanga taanna misileqqullugu.
Johnny Mieth pillugu oqaluttuaq tamaat aviisimi Sermitsiami atuaruk. Uani isissutissarsigit: