Sakkutujuusussaatitaanermut misilitsittarnerup taamatinneqarnera isornartorsiorneqartoq
Kalaallit inuusuttut illersornissamut ilaassanngillat, sakkutuujusussaatitaanermullu misilitsinnissat pilersaarutaasut unitsinneqassapput. Pele Broberg illersornissamut ministerimik ataatsimeeqateqareerluni maajimi taama nalunaarpoq. Anguniagaq allanit tusarneqarsimanngitsoq, Demokraatineersoq Anna Wangenheim oqarpoq, naak naalakkersuisunit nutaanit attuumassutilinnik tamanik, aamma Inatsisartunit ataatsimiititalianillu, akuutitsisarnissaq suaartaatigisarsimagaluaraat.
Sermitsiaq illersornissamut ministerip Trine Bramsenip (S) aamma niuernermut inuussutissarsiutinullu naalakkersuisup Pele Brobergip (Naleraq) akornanni 2021-mi upernaakkut oqaloqatigiinnerannit allagaatinik takunnissinnaatitaanermut akuerineqarsimavoq. Naak maajip 10-ani illuatungeriit oqarasuaatikkut oqaloqatigiinnerannit imaqarniliaq pingaarutilik allagaatinik takunnissinnaatitaanermut ilanngunneqanngikkaluartoq, Trine Bramsenimit Pele Brobergimut malittaasumik mailimit, maajip 15-iani nassiunneqartumit, paasineqarsinnaavoq, Pele Brobergip ataatsimiinnermi oqaatigisimagaa, kalaallit inuusuttut illersornissamut ilaatinneqassanngitsut, sakkutujuusussaatitaanermullu misilitsinnissat Nuummi, Aasianni, Sisimiuni Qaqortumilu juunip 3-anit 11-anut ingerlanneqartussatut pilersaarutigineqartut, taamaatinneqassasut.
Aviisi Sermitsiaq taama allappoq.
Ullut pingasut tamatuma kingorna Nunanut allanut, Niuernermut Inuussutissarsiornermullu Naalakkersuisoqarfimmi naalakkersuisoqarfiup taamani pisortaata, Kenneth Høeghip oqarasuaatikkut oqaloqatigiinnermi uppernarsarpaa, Kalaallit Nunaanni sakkutuujusussaatitaanermut misilitsinnerit 2021 tamakkerlugu taamaatinneqarnissaat, Namminersorlutik Oqartussanit ersarissumik kissaatigineqartoq.
Ersarissumik anguniagaqarsimasoq
Pele Broberg naalakkersuisuunermini siulliit ilaattut kalaallit inuusuttut sakkutuujusussaatitaanermut misilitsinnissamut periarfissaannik – illersornissaqarfimmi ilinniagaqarsinnaanissamut tunngaviusumik - unitsitsisimanera Demokraatinut ilaasortamit Anna Wangenheimimit, aasaq tamakkerlugu Kalaallit Nunaanni sakkutuujusussaatitaanermut misilitsinnerit taamaatiinnarneqarnerisa ingerlanneqarnerannik apeqquteqartarsimasumit, ernumanartinneqarpoq.
Aviisimi Sermitsiami allaaserisaq tamakkerlugu atuarsinnaavat: