eqqakkat
Sakkutooqarfiusimasup salinneqarnerata unittoorsimanera Atassutip isornartorsiorpaa
Pinngortitamut avatangiisinullu naalakkersuisuusimasoq, Mala Høy Kúko, sakkutooqarfiusimasumi Ikkatsip eqqaani saliinissamut pilersaarutit unittoorsimammata isornartorsiuivoq
Nappartat manngertornersimasut 100.000-t sinneqartut eqqakkallu allat qimaannakkat, Amerikamiut sakkutooqarfigisimasaani Bluie East 2-mi Ikkatsip eqqaaniittut peerneqarnissaannut maanna pilersaaruteqartoqanngilaq.
Tamanna namminiilivinnissamut, pinngortitamut, avatangiisinut nunalerinermullu naalakkersuisup, Suka K. Frederiksenip (S) § 37 naapertorlugu apeqqummut akissuteqaataani atuarneqarsinnaavoq.
Tamannalu akissut Mala Høy Kúkop (A) isumaqatiginngilluinnarpaa.
Atuaruk: Sakkutooqarfikumik saliinissamut atsiornernik 2.500-nik katersiniartoq
- Tamanna nunatsinni inuiaqatigiittut avatangiisinut eriaginninniartuunitsinnut naapertuutinngilluinnarpoq aammalu tamatsinnut naammaginanngilluinnarpoq, taanna tusagassiuutinut nalunaarummi allappoq.
Aggustimi siorna Mala Høy Kúkop (A) danskit avatangiisinut inuussutissanullu ministeriat Esben Lund Larsen (V) peqatigalugu Ikkatseq tikeraarpaat.
- Tamatuma kinguneranik saliinissamut suliniutissat pilersaarusiorneqarsinnaanissaannut oqaloqatigiinnerit aallartisarneqarnissaat isumaqatigiissutigineqarsimangaluarpoq, Mala Høy Kúko allappoq.
Tasiilap eqqaani sakkutooqarfiusimasumi maanna suliaqartoqarnianngitsoq, Suka K. Frederiksenip (S) akissutaani atuarneqarsinnaavoq.
- Maannarpiaq Ikkatsimi saliinissamut isumaqatigiissutinik pilersaarutinilluunniit aalajangersimasunik soqanngilaq, kisiannili Tunumi Ikkatsimi sakkutooqarfiusimasoq nunatsinni sumiiffippassuit ilagaat, eqqakkat qimaannakkat isumagineqarnissaannik Naalakkersuisut suliaqarfIgisaat.
Aammattaaq danskit avatangiisinut ministeriannik Esben Lund Larsenimik (V) suilap oqaloqatigiissutiginissaanut pilersaaruteqartoqanngilaq.
Mala Høy Kúkop suliap ingerlateqqinneqannginnera naammagisimaanngilluinnarpaa.
- Ajuusaarnarpoq suliaq annertooq ingerlatereerlugu taamatuinnaq Naalakkersuisut unitsipajuinnarsimagamikku, uffa ukiuni taamannanik nillianeq ingerlareersoq, suliffissanillu annertuunik pilersitsiffiusinnaasutut takorloorneqarsinnaagaluarpoq, taanna oqarpoq.