Kangilinnguit

Sakkutooqarfiusimasup oqallisaaneranut uummarsaasoq

Kangilinnguani uuliamik mingutsitsineq ilisimatuutut misissuinernik aallarnisaasuusinnaavoq, illussanik titartaasartoq Peter Barfoed isumaqarpoq

A-bygningen, dalshop, Grønnedal
Kangilinnguit maanna matuneqarnikuullunilu inoqanngilaq

Sakkutooqarfimmi matuneqarsimasumi, Kangilinnguani uuliamik mingutsitsineq ilisimatuutut misissuinernik aallartisaasinnaavoq. Taamaalilluni avatangiisinut ajornartorsiutip sakkutooqarfiusimasup piuinnarnissaanut tunngaviussagaluarpoq, Nuummi illussanik titartaasartoq Peter Barfoed isumaqarpoq.

Atatiinnarneqarsinnaasut
Taassuma ilungersorluni tunngavilersorpaa, sakkutuuerutereernerata kingorna illut piffimmi tassaniittut atatillugit suli atorluarneqarsinnaasut. Kisianni sakkutuut septemberimi siorna tassani suliatik unitsippaat. Pilersaarutillugu malillugit sakkutooqarfiusimasoq ingutserneqassaaq, taamatullu avataangiisinik saliisoqassalluni.

Kisianni Folketingip Illersornissamut Ataatsimiititaliaata ullumi ataasinngornermi ataatsimiinnerminni Kangilinnguit oqallisigisussaaneranut atatillugu, illussanik titartaasartoq nutaanik siunnersuuteqarpoq.

Iliuutsit nutaat
Peter Barfoedip tassunga atatillugu tikkuarpaa, US Army Research and Development Center Amerikami suliffeqarfik, Geosyntec Consultants, peqatigalugu toqqavinnik toqunartunik mingutsinneqartunik nutaamik saliinermik iliuutsimik pilersitsisimasut.

Tassani nunamik mingutsinneqarsimasumik saliinermi elektrokinetikimik taaneqartartoq aamma bakteeriat atorneqartarput, tamannalu Danmarkimi ingeniørit Nirasimeersut peqatigalugit misilittarneqareersimavoq. Taamatullu misiliineq aamma Kangilinnguani nunataani uuliamik mingutsinneqarsimasumi misilittarneqarsinnaavoq, arkitekti taama isumaqarpoq.

Atuaruk: Kangilinnguani antennit qaminneqarput

USA ilaasoq
USA-mi teknologiip saniatigut aamma piffiup siunissaanut pingaarutilittut allatut inissisimasinnaavoq. USA-p Danmarkillu akornanni illersornissamut isumaqatigiissut 1954-meersoq naapertorlugu amerikamiut Kangilinnguanik piginnittuupput, taamatullu tunngaviusumik danskinut atukkiussisuullutik.

Akisussaaqataaneq
Illersornissamut ministeriap, Namminersorlutik Oqartussat aamma Kommuneqarfik Sermersuup aprilimi 2012-mi ataatsimiinnilersaarutaat naapertorlugu, amerikamiut aaqqiissutissamik nassaarnissamik Kangilinnguit siunissaat apeqqutaatillugu ikiuukkusupput.

Aammalu USA mingutsitsinermut pisooqataasutut illunullu akissussaaqataanerarput. Kisiannili aningaasaliissutit agguataarneqarnissaanut amerikamiut qallunaallu illersornissamut ministeriaqarfiisa akornanni oqallisaaqqaartariaqassapput.

Qaaqquneqarsinnaasut
Tamanna tunuliaqutaralugu US Army Research and Development Center, Geosyntec Consultants kiisalu Niras Kangilinnguanut qaaqquneqarsinnaasut, Peter Barfoed isumaqarpoq. Taakku saniatigut soqutiginnittut, soorlu DTU-mi Center for Arktisk Teknologi, ilinniarfiit nunanit tamalaaneersut il.il.

- Tassalu, ilisimatuutut misissuisarfik siullerpaaq piffimmi pilersinneqassaaq. Taamatullu mingutsitsinernik saliinermut piginnaasanik pitsaasumik ineriartortsitsineq, nunanit tamalaanit sammineqaqisoq piumaneqaqisorlu. Tamanna periarfissatsialaavoq, illussanik titartaasaroq erseqqissaavoq.

Assit takukkit: Nunarput Kangilinnguit aqqutigalugu qorsuunerulersinneqarli

Powered by Labrador CMS