Sakkutooqarfitoqqani saliineq kinguaattooqqasoq
Piffissap suliffiusussap sivikinnera, silamit akornguserneqartarneq coronalu pissutaallutik sakkutooqarfitoqqani saliineq pilersaarutaasumit sivisunerussaaq, taamatut ilisimatitsivoq Danmarkimi avatangiisinut ministeri.
2017-imi Naalakkersuisut siulittaasorisaatt Kim Kielsen Danmarkimilu avatangiisinut ministeriusoq Esben Lunde Larsen saliisoqarnissaanik isumaqatigiissuteqarput.
Tassunga atatillugu Amerikamiut nunami maani sakkutooqarfitoqaanni 2018-imiit 2023-mut saliinissamut Danmarkimit 180 millioner koruunit immikkoortinneqarsimapput.
Illersornissaqarfiulu aningaasaliissutinit maanna 24 millioner koruunit kisiisa atorsimavai. Siunertaagaluarpoq saliinermut ukiumut 30 millioner koruuninik aningaasaliissuteqartoqartassasoq.
Avatangiisinut ministeri Lea Wermelin (Soc,) folketingimi ilaasortamut Aki-Mathilda Høegh-Damimut (S) akissuteqarluni taamatut ilisimatitsissuteqarpoq.
Saliineq 2023-mi naammassineqarsinnaanngitsoq
Avatangiisinut ministerip oqaatigaa, suliassaq naatsorsuutigisamit ajornakusoornerusoq, aallaqqaammullu pilersaarutaasoq malinneqarsinnaanngitsoq:
- Suliassat sinneri 2023-p naanerni naammassineqarsinnaanngitsut nalilerneqarpoq, Lea Wermelini saliineq pillugu allappoq.
Taamaammat aningaasaliissutit ilaat 2024-mut nuunneqarsimapput, ministeri nangilluni oqarpoq.
Ministerip ilisimatitsissutigaa, pissutsit arlallit, soorlu piffissap suliffiusussap sivikinnera, sumiiffiit tikikkuminaannerat silallu akornusiisarnera suliniarnermut ajornartorsiortitsisartut. Taakkununnga ilanngullugu coronamut atatillugu killilersuutit sulinermut killileeqataasimapput.
Sumiiffiit ilaasa eqqissisimatinneqarnissaat inassutigineqarsimasoq
Sumiiffiit ilaat saliisoqartinnagu piffissami sivisunerusumi nalilersorneqartariaqarput. Ministeri naapertorlugu, assersuutigalugu Kujataani Artillery Pointip eqqissisimatinneqarnissaa Nunatta Katersugaasiviani Allagaateqarfianillu inassutigineqarsimavoq.
Kommuni Kujalleermit isummerifigineqassaaq, kommuni inassuteqaammik malinnissanersoq, taamalu Amerikamiut qimaannagaat salinneqassnnginnersut.
Danmarkimi avatangiisinut ministerip oqaatigaa, ilaatigut eqqissisimatitaasanik amerlanerusunik suliaqartoqassanersoq apeqqutaalluni, saliinerit qaqugu naammassineqarsinnaanersut oqaatigiuminaatsoq.
Saliineq Avatangiisinut ministeeriaqarfimmeersunik kiisalu Nunalerinermut, Imminut Pilersornermut, Nukissiuutinut Avatangiisinullu Naalakkersuisoqarfimmeersunik aamma Illersornissamut ministeeriaqarfimmeersunik aqunneqarpoq. Taakkua saniatigut Kommuneqarfik Sermersooq aamma peqataavoq, kommuneqarfik sumiiffinni qulini salinneqartussani sanaartortitsisuugami.
Sumiiffiit 18-it salinneqartariaqartutut naliliiffigineqarsimapput. Illersornissamut ministeeriaqarfimmi Ejendomsstyrelse sumiiffinnik arfineq-pingasunik sinneruttunik saliinissamik isumaginnittussaavoq.