Sakkutooqarfimmit timmisartut malersuutit Kalaallit Nunaannut piareersarneqarput
Danmarkip timmisartuutaasa nutaat F-35-t ilaat Kalaallit Nunaanni suliaqartarnissamut piareersimassapput, Illersornissaqarfimmi timmisartortartut pisortaat ilisimatitsivoq.
Danmark timmisartunik malersuutinik F-35-nik taaneqartartunik 27-nik pisiaqarsimavoq, timmisartut malersuutit F-16-it pisoqalisut taarsissaannik.
Generalmajor Anders Rex, Illersornissaqarfimmi timmisartortartut pisortaat tusagassiorfimmut Defense Newsimut ilanngutassiamini allappoq.
Generalmajorip ilisimatitsissutigaa, timmisartut F-35-t ilaat skærmimik nunninnermi siaarneqarsinnaasunik ikkussivigineqassasut, timmisartut "mittarfimmut sermersimasumut" missinnaanissaat anguniarlugu.
Timmisartut malersuutit suliaqarnissamut periarfissaqarnerulernerat
- Kalaallit Nunaanni mittarfiit 2.000 meterit sinnerlugit takissusillit amerlineqarnissaannik aalajangersimanerup malitsigisaanik, timmisartut malersuutit suliaqartarnissaminnut periarfissagissaarnerulissapput, Anders Rex allappoq.
Nuummi Ilulissanilu mittarfissat nutaat, naammassillugit suliarineqarunik 2.200 meterit sinnerlugit takitigissapput.
Generalmajorimit erseqqissaassutigineqarpoq, timmisartut malersuutit nutaat takkua Issittumi suliaqartassanersut suli aalajangiiffigineqanngitsoq.
F-35-lli Danmarkip silaannakkut illersorneqarnissaanut pigisaminillu nakkutilliinissaanut qitiusumik inissisimassapput, Anders Rex erseqqissaavoq.
Danskit Kalaallit Nunaanni isumannaallisaanikkut amerlanerusunik suliniuteqarniartut
Generalmajorip nalunaaruteqarneranut peqatigitillugu illersornissamut ministeri Trine Bramsen (Soc.) Kalaallit Nunaannut sisamanngormat tikeraarpoq.
Ministeri suliniutinik tigussaasunik nassarluni tikeraarpoq. Ilaatigut Nuummi InterForcep allaffissaa ammarpaa, aamma nalunaarutigineqarpoq Danmark siunissami Nuummi siunnersortimik sulisoqarniartoq.
Siunnersorti kalaallit danskillu oqartussaasuisa isumannaallisaanermut politikkeqarnerannut atassuteqaataassaaq.
Trine Bramsenip tamatuma saniatigut siunnerfik atsiorpaa, siunnerfik malillugu Naalakkersuisut danskillu naalakkersuisuisa Kalaallit Nunaanni internetsikkut isumannaallisaanerup nukittorsarneqanissaa suleqatigiissutigissavaat.