Sakkut pillugit inatsit nutaaq: Qaqugu saqqummiunneqassava?
Sakkut pillugit inatsisissatut siunnersuut ukiup ataatsip matuma siorna tusarniaassutigineqarpoq, siunnersuulli maannamut Inatsisartuni suli suliarineqarsimanngilaq, tamanna Justus Hansenip Demokraatineersup tupigusuutigaa.
Justus Hansenip Demokraatineersup paragraf 37 naapertorlugu apeqquteqarnermigut paaseruppaa, sakkut pillugit inatsisissaq qaqugu Inatsisartunut saqqummiuneqassanersoq.
Siunnersuummi ilaatigut pineqarput aallaasit toqqorsiveqartinneqarnissaaannut aamma illoqarfimmi najugaqarfiit akornanni illuinnarsuutinik eqqunngitsumik iginnerup pinerluutinngortinneqarnissaanut piumasaqaatit.
Paasisaqarusuttoq
- Tamakkuupput sammisani ukiut qulinngulersuni sulissutiginikuusakka, taamaammallu Naalakkersuisut siunnersuutip qaqugu Inatsisartunut saqqqummiunneqarnissaa ilimagineraat paasissallugu soqutigeqaara, Justus Hansen apeqqumminut tunngavilersuilluni allappoq.
- Malittarisassat nutartikkat ersarinnerusullu aallartoornermik ajutoortarnernut pinngitsoortitsisuusinnaanera, taassumallu kingunerisaanik inuit inuunerannik aannaassisuusinnaanera upperaara, Justus Hansen erseqqissaavoq.