Sakkortuumik ujajaasoqarsimanera politiit misissuiffigaat

Kalaallit Nunaata Politiivisa arfininngornermi ullaakkut ujajaasoqarsimanera misissuiffigaat. Nuummi illoqarfiup qeqqani angutip ujajaaffigitinneranik takunnittut ilisimannittulluunniit politiinut saaffiginneqquneqarput.

Angut Nuummi illoqarfiup qeqqani arfininngornerup ullaassaani angutinit marlunnit unguneqarpoq, anaalerummillu qisuusumit anaaneqarluni.

Kalaallit Nunaata Politiivisa pisoq pillugu arfininngornermi ullaaralaakkut nalunaarfigineqarput, suliarlu maanna misissuiffigineqarpoq.

- Saassunneqartoq soorunami tupaqqasorujussuuvoq. Taanna oqaluttuarpoq qisummik anaalerummik anaatereernermi kingorna saassussisunut mobilini tunniuttariaqarsimallugu, politiini pigaartut aqutsisuat Søren Bendtsen Sermitsiaq.AG-mut oqaluttuarpoq.

- Pisoq sakkortuvoq, suliarlu maanna misissuiffigaarput, oqarpoq.

Pinerliisut marluupput

Søren Bendtsen ilisimatitsivoq saassutsittoq illoqarfimmiit arfininngornerup ullaaralaani angerlarniartilluni angutinit marlunnit tikinneqarsimasoq, aappaalu qisummik anaaleruteqarsimasoq. Angutit marluk siorasaarisimapput mobilimik aningaasanillu tunineqanngikkunik anaalerummik anaasiniarlutik. Anaalerummit anaatereernermi kingorna pinerluffigitittup mobilini tunniussimavaa.

Pigaartut aqutsisuat ilisimatitsivoq angut illoqarfiup qeqqani siorasaarisaqattaartoq politiinut tallimanngornermi unnuap qeqqata missaani aamma nalunaarutigineqarsimasoq.

- Maannakkorpiaq ilisimanngilarput pisut taakku marluk imminnut attuumassuteqarnersut, pigaartut aqutsisuat oqarpoq.

Angutit marluk ujajaasut pillugit politiit annertunerusumik maannakkut paasissutissaateqanngillat.

Ilisimannittunik ujaasisut

Suliaq pillugu ilisimannittunik politiit ujaasipput:

- Inuit ujajaanermik takunnittut ilisimannittulluunniit oqaloqatigerusuttorujussuuagut, Søren Bendtsen oqarpoq.

Ilisimannittut politiinut oqarasuaat 70 1448-mut sianeqquneqarput.

Powered by Labrador CMS