Sakkortuumik persuttaasimapput: Tilluutit savimernit puiaasarlu aseqqukoq atorlugit

Angutit marluk 20-ikkunni ukiullit 2017-imi 2018-imilu Nuummi illoqarfiup qeqqani arlaleriarlutik sakkortuumik persuttaasarsimasutut unnerluutigineqarput. Angajulleq tarnikkut katsorsagassatut tigummisassanngortinneqassaaq atornerluinermullu katsorsagassanngortinneqassalluni, taamatut isumaqarpoq unnerluussisussaatitaasoq.

Nuummi illoqarfiup qeqqani sakkortuumik saassussisarnermik eqqartuussinernut ullut arfinillit atugassanngortinneqarput.

Aviisi AG allappoq.

Unnerluussaasut tassaapput angutit inuusuttut marluk, aappaa 27-inik aappaalu 24-inik ukiullit, marluulllutik Nuummeersut, unnerluunneqarpullu pinerluttulerinermi inatsimmi §88-imik, nakuusernermut tunngasumik, katillugit tallimariarlutik unioqqutitsisimasutut.

Paragrafi taanna Kalaallit Nunaanni kredsrettini nunattalu eqqartuussiviani atorneqakulanersaavoq, tamannalu aamma angerlarsimaffimmi nakuusernernik nalunaarutit amerlassusaatigut takuneqarsinnaavoq.

Nalunaarutiginninnerit amerlanerpaartaat Nuummi pisarput, politiillu siornamut ukiumoortumik kisitsisitigut takussutissiaanni takuneqarsinnaavoq nuna tamakkerlugu nakuusernernik nalunaarutiginninnerit tamarmiusut amerleriangaatsiarsimasut (boksi takuuk).

Pisimasumi matumani, maajimi Sermersuup Eqqartuussiviani suliarineqartussami, angut angajulleq 2017-imi septembarimi sapaatip akunnerata naanerani pisimasunik marlunnik unnerluutigineqarpoq. Unnerluussinermut allagaq naapertorlugu tallimanngornermi unnuakkut 27-inik ukiullip inuk tilluarlugulu isimmitsarsimavaa. Aqaguani unnuakkut aamma alla tilluarlugulu isimmitsarsimavaa, unnerluussut naapertorlugu ima sakkortutigisumik persuttarneqartoq ilisimajunnaarsimalluni timimigullu aqqunartitersimalluni, qaamigut tinulluni, isimigut tilluusarluni kigutaalu pingasut napisimallutik. Unnerluussinermut allagaq naapertorlugu saassussinerit pisarsimapput allat peqatigalugu, taakkualu immikkoortillugit suliarineqassapput.

Aviisimi AG-mi suliat eqqartuussivimmi suliarineqartussat pineqartut pillugit atuarnerusinnaavutit:

Powered by Labrador CMS