Sakkortuumik isornartorsiuineq: Aalisarnermut Piniarnermullu Naalakkersuisoqarfiup aammaarluni inatsisit malinngilai
Aalisarnermut Piniarnermullu Naalakkersuisoqarfik ataatsimoorluni piniagassanik tikaagullinniarnermik piffissaq eqqarsaatigalugu killilersuisimavoq, tamannalu Ombudsmandip oqarnerat naapertorlugu inatsisit malinnagit pisimavoq.
- Ernumanartuuvoq ajornartorsiuterujussuullunilu.
Ombudsmandi Vera Leth, Aalisarnermut Piniarnermullu Naalakkersuisoqarfimmut sakkortuumik taama isornartorsiuivoq – maannakkullu nalinginnarmit sakkortuneruvoq. Tassami ombudsmandip oqarnera naapertorlugu naalakkersuisoqarfik aappassaanik inatsisinik atuuttunik malitaqanngilaq.
Kingullermik novembarimi 2022-mi, naalakkersuisoqarfik ataatsimoorluni tikaagullinniarnissamut pisassiissutinut itigartitsissuteqarpoq. Ataatsimoorluni piniagassanik tikaagullinniarnermik piffissaq eqqarsaatigalugu killilersuisoqarnissaanik Naalakkersuisut 2021-mi decembarimi aalajangernerat Naalakkersuisoqarfiup itigartitsinermut tunngavigisamisut innersuussutigaa.
Ombudsmandip misissuineranut atatillugu Naalakkersuisoqarfiup oqaatigaa Naalakkersuisut aalajangernerat itigartitsinermut inatsisikkut tunngavissatut atuussinnaassuseqartutut isigigini.
Kukkunermik kukkussuteqaqqinneq
Ombudsmandip naalakkersuisoqarfik isumaqatiginngilaa.
Naalakkersuisoqarfiup inatsit Inatsisartunit akuerineqartoq, pisassiissutinik aqutsinermini malittuaannassagaa taanna naqissusiivoq.
Ombudsmandillu tamanna aamma suliami allami 2021-meersumi isornartorsiornikuuaa. Taamanikkut naalakkersuisoqarfik ombudsmandi isumaqatigalugu nassuerutiginnippoq, suliallu attuumassuteqartut tamaasa suliareqqippai.
Ombudsmandip tamanna tunuliaqutigalugu naalakkersuisoqarfiup kukkussuteqaqqinnera akuerineqarsinnaanngitsoq oqaatigaa.
- Naalakkersuisoqarfiup kukkunermik siusinnerusukkut nassuerutigisimasaminik kukkussuteqaqqinnera ernumanartuuvoq ajornartorsiuterujussuullunilu.
Inatsisinut Ataatsimiititaliaq ilisimatinneqartoq
Naalakkersuisoqarfik aalajangiinerminut taarsiullugu inatsimmik tunngaveqartariaqaraluartoq, Vera Leth ilisimatitsivoq.
Ombudsmandip oqarnera naapertorlugu, naalakkersuisoqarfik taamaaliornissaminut periarfissaqarsimavoq, piginnaatitsissutitut aalajangersakkamik taaneqartoq suliassaqarfimmi tassani inatsimmi atuuttumi pioreersoq tunngavigalugu.
Ombudsmandi naliliivoq suliami annertunerusutigut kukkussuteqartoqarsimasoq sumiginnaasoqarsimasorlu, taamaattumillu Inatsisartut Inatsisinut Ataatsimiititaliaat aamma Naalakkersuisut suliamik nalunaarfigai.
Sermitsiaq.AG Aalisarnermut Piniarnermullu Naalakkersuisoqarfimmit oqaaseqartitsiniarsarivoq.