Sakkortuumik isornartorsiuineq taasititsisoqarnissaanullu kaammattuineq: Tunngaviusumik inatsisissatut siunnersuut Danmarkimi assigiinngitsunik qisuariarfigineqarpoq

Qaammatip siuliani Kalaallit Nunaata namminersulivinnissaanut tunngaviusumik inatsisissatut siunnersuut persuarsiorluni nalliuttorsiortitsilluni Nuummi Ilimmarfimmi saqqummiunneqarpoq.

Nunatsinni partiit akornanni missingiut assigiinngitsumik tiguneqarpoq, aamma Danmarkimi Folketingimi taamaappoq.

Tunngaviusumik inatsisissamik aamma namminiilivinnissamik suliaqarneq pillugu danskit partiit qanoq isumaqarnersut, kiisalu free associationip Kalaallit Nunaata namminiilivinnissamut aqqummini tullertut alloriarfissaattut isigineraat, Sermitsiaq.AG-p danskit partiivi apeqquteqarfigai. Tunngaviusumik inatsisissatut siunnersuummi free association periarfissatut oqaatigineqarpoq.

Partiit naalakkersuisuutitaqartut naalagaaffeqatigiinnermut nukittuumut pingaartitsillutik Socialdemokratiet aamma Moderaterne oqariartuuteqarput, kiisalu Kalaallit Nunaanni oqallinnermut akulerunniaratik oqarput.

Mette F. aamma Moderaterne: Oqallinneq ataqqiniaraat

Folketingimi oqallittoqarnerani ministeriuneq Mette Frederiksen (Soc.) ima oqarpoq:

- Kalaallit Nunaanni inatsit tunngaviusussamut siunnersuut pillugu oqallittoqarusuttoq paasivara. Kalaallit oqallisiginnikkusuppata, taava uagut ataqqissavarput, naalakkersuisullu taamaaliorniarlutik eqqarsarput.

Moderaternemit Kalaallit Nunaannut tunngasunut oqaaseqartartoq Lean Milo allagaqarluni akissuteqarnermini assingusumik oqariartuuteqarpoq:

- Savalimmiut, Kalaallit Nunaata Danmarkillu akornanni ataatsimoornerup ineriartortinnissaa naalakkersuisut kissaatigaat. Ammasumik uummaarissumillu oqallinnikkut ilaatigut taamaaliussaagut. Kalaallit tunngaviusumik inatsisissaannut tunngatillugu Kalaallit Nunaata iluani pisussaavoq. Tamanna ataqqerusuppara, taamaattumillu allamik oqaasissaqarfiginngilara.

Naalakkersuisoqataasut pingajuat, Venstre, Sermitsiaq.AG-p saaffiginnissutaanut uterfiginninngilaq.

Hønge: Innuttaasunik taasititsisoqarniarli

Socialistisk Folkepartimi oqaaseqartartoq Karsten Hønge oqaaseqarnissaminut tunuarsimaanngilaq. Kalaallit Nunaannilu Danmarkimit avissaarusuttoqarnersoq paasiniassallugu, tunngaviusumik inatsisissatut siunnersuut atorneqartariaqartoq, taanna kaammattuivoq.

Maanna inissisimaneq tamanut piukkunnanngitsuusoq taanna isumaqarpoq:

- Kalaallit Nunaanni pissutsit isumaqarfiginissaannut pisariaqartitsinngilanga. Kisianni Danmarkip tungaanit Kalaallit Nunaata Danmarkimut attaveqarnerminik maanna tunngatillugu inissiissappat pitsaasuussasoq isumaqarpunga. Tassani siunnersuut qulaajaanissamut alloriarfiusinnaavoq. Danmarkillu naalagaaffeqatigiinnermik qanoq iliorusunnerluni isumaliuteqarnissaanut piffissaq naleqquttuusoq isumaqarpunga, taanna oqarpoq, nangillunilu:

- Qanoq annertutigisumik aamma sukkatigisumik namminersulivinnissap pissaneranik, Kalaallit Nunaata innuttaasunik taasititsinernik arlalinnik aallartitsinissaa kaammattuutigaara. Maanna inissisimaneq piukkunnanngilaq, Kalaallit Nunaat toqqaannanngitsumik namminiilivinnerunissamik piumasaqartoq, kisianni Danmarkip tamanna piviusunngortikkuminaatsikkaa.

Danmark aamma Kalaallit Nunaat ataatsimut siunissaqarnissaat neriuutigalugu, Karsten Høngep naqissuserpaa.

Jarlov: Politikerit inunnik pututitsiniarput

Politikkimi talerperlerni Konservativenit tunngaviusumik inatsimmik suliniuteqarneq isornartorsiorneqarpoq, tassani oqaaseqartartup Rasmus Jarlovip, tunngaviusumik inatsisissamik suliaqarneq, kalaallit politikerit aalajangersimasut oqaluttuarisaanermut ilanngunniarsaralugit suliaanerarpaat:

- Kalaallit politikerit ilaannit Kalaallit Nunaata namminersulivinnermigut Naalagaaffeqatigiinnermit aamma avataaniinnermit, taakkua pitsaanerpaartaannik toqqaasoqarsinnaaneranik innuttaasut pututinniarneqartut isumaqarpunga. Soorunami taamaalinavianngilaq, Kalaallit Nunaannut tunngasunut oqaaseqartartoq, Rasmus Jarlov oqarpoq.

Nammineq isumaa naapertorlugu, Kalaallit Nunaat namminersulivippat Danmark pisussaaffeqarnavianngilaq, Kalaallit Nunaannilu namminersulivinnermi sunarpiaq anguniarneqarnersoq isumaliutigineqartariaqartoq, taanna kaammattuivoq:

- Kalaallit Nunaat Danmarkimit annertuumit tapiiffigineqartarnermigut pisuujunerullunilu inuiaqatigiit ingerlalluarnerupput. Suleqatinik allanik Kalaallit Nunaannut taama paasinnitsigisumik ataqqinnitsigisumillu nassaassaqanngilaq, nunanit allanit namminersulivinnissaq aamma ajornarluinnarpoq, Rasmus Jarlov oqarpoq.

Liberal Alliance Kalaallit Nunaata namminersornerulernissaa kissaatigaa

Liberal Alliancemi (LA) Kalaallit Nunaata namminersulivinnissaanut pitsaasumik isumaqartoqarpoq, oqaaseqartartoq Carsten Bach ilisimatitsivoq:

- Kalaallit Nunaata namminersulivinnissaanut ammasumik oqallinnerit naalagaaffeqatigiinnermi inissaqartinniartariaqarput. Namminersulivinnissaq pillugu oqaluuserinninngikkutta paquminartunngussaaq, tamannalu eqqortuusinnaanngilaq, taanna allagaqarluni akissuteqarpoq, nangillunilu:

- Savalimmiut Kalaallit Nunaatalu namminiilivinnerunissaannik LA-p kissaateqarnera nalornissutigineqassanngilaq. Siullermik maanna sinaakkutit iluanni suliassaqarfiit arlallit angerlaassorneqarnerisigut pisinnaavoq.

Kalaallit Nunaata namminersulivinnissaa, Danmarkimiillu avissaarnissaa sioqqullugu aningaasaqarnikkut tunngavissat inissinneqarnissaat LA-mut pingaaruteqartoq, Carsten Bach naqissusiivoq.

DF-ip namminersulivittoqarnissaa kissaatiginngilaa

Kalaallit Nunaata namminersulivinnissaa partiimit kissaatigineqanngitsoq, Dansk Folkepartip Kalaallit Nunaannut tunngasunik oqaaseqartartuanit Alex Ahrendtsen oqariartuutigineqarpoq:

- Dansk Folkeparti Naalagaaffeqatigiinnermut tapersersuisuuvoq, Kalaallit Nunaatalu namminiilivinnissaanik kissaateqanngilaq, Alex Ahrendtsen oqarpoq.

Kalaallit Nunaalli namminersulivissappat, siunissami free associationimik isumaqatigiissuteqarnissamut ammavoq. Tamannali piviusorsiortutut nalilinngilaa, tassami Kalaallit Nunaat namminiilivilluni nalunaaruteqarpat, USA naalagaanialertussaasoq isumaqarami.