Sakkoqarani naleqartitanik sorsuutiginnittoq
Pele Broberg sakkutuulersuiunnaarsitsiniarpoq, politikkili pineqaleraangat sakkussaqarani tamaviannguat naleqartitanik sorsuutiginnittarpoq. Inuit qinigaat inatsisartuni katersuuteqqippata nipikisaartoqarnavianngilaq.
Politikerit tallimanngorpat Ukiakkut Ataatsimiinneq aallartikkiartorlugu Inatsisartut ataatsimiittarfiannut ingerlaaqatigiippata tamanna pissanganartumik tunuliaqutaqarluni pissaaq. Naalakkersuisoqatigiinni ilaasortat mianersortariaqarput. Sikumi saattumi pisupput.
Aviisi AG taama allappoq.
Qanittukkut Atassut nalunaarpoq Pele Broberg tatigiunnaarlugu. Taamatut nalunaaruteqarneq, inatsisartoqarnikkut imatut sunniuteqarnavianngilaq, IA Nalerarlu katillugit 16-inik ilaaortaatitaqarmata. Ataatsimik amerlanerussuteqarlutik. Sapaatilli akunnerata naanerani IA-p ataatsimeersuarnerani ilaasa Naleqqamik suleqateqarneq isornartorsiormassuk ajornartorsiutit ingerlaqqipput.
Pingaartumik akerleriissutit tassaaginnanngimmata Pele Brobergip qallunaat tusagassiorfiini taasisinnaatitaaneq, naalagaaffeqatigiinneq qallunaallu sakkutuui pillugit oqaaseqaatai sakkortuut. Aammattaarli ataatsimiinnermi taasissutigineqartussat nalinginnaanerusut eqqarsaatigalugit.
- Jens Napaattuup aningaasanut inatsisissatut siunnersuut isumaqatigalugu taasinianngilaq qaleralinnut akitsuut peerneqareertinnagu, KNR qanittukkut allappoq.
Taamaalillutik illua’tungiliuttunut ilaasortat ammaanersiorluni oqallinnermi inimi ataatsimiittarfimmi mumisitsiniartutullusooq ingilluataareersinnaapput, naalakkersuisoqatigiillu iluminni aaqqiagiinngissuteqarnerat qilanaaralugu. IA Nalerarlu suli avissaarnerutilerniarlugit pissutsit tamakkiisumik atorluarniarneqassapput.
Demokraatit siulittaasuat Jens-Frederik Nielsen isumaqarpoq sapaatip-akunnerata naanerani oqaatsitigut sorsunnikkut ajornartorsiutit pinartut tunulliunneqartut, tamakkualu taamaallaat aaqqinneqarsinnaasut nunamik aqutsisut allorissaaqatigiinneruppata. Tassami sammisassaaleqinanngilaq: Corona, aalisakkat akii appartut, nunatta karsiata aningaasanik amigaateqarnera peqqinnissaqarfiullu tatineqarnera.
- Ersarippoq naalakkersuisoqatigiinni arlalinnik immikkoortoqartoq. Illua’tungaaniippoq Pele Broberg, illua’tungaaniillutillu Asii Chemnitz Narup Naaja Nathanielsenilu. Qeqqaniipporlu Múte B. Egede. Ersarippoq Naalakkersuisut ingerlalluanngitsut, Jens-Frederik Nielsen AG-mut oqarpoq.
Aviisimi AG-mi allaaserisaq tamakkerlugu atuarsinnaavat. Aviisi uani pissarsiariuk: