Sakio Fleischer pakatsisimasoq: Palle Jerimiassen isumaqatigiissummik qimarratiginnippoq
Siumut Naleqqamik suleqateqarniarunnaarluni aalajangerami Demokraatit attaviittorlu Palle Jerimiassen isumaqatiginninniarfigalugit aallartissimavoq. Taakku akornanni isumaqatigiissutissaq naammassineqarsimavoq. Palle Jerimiassenili Siumut avaqqullugu isumaqatigiissuteqarsimavoq. - Tamanna assut pakatsinarpoq, Sakio Fleischer oqarpoq.
Siumut Sakio Fleischerimik siuttoqarluni Demokraatinik attaviittumillu Palle Jerimiassenimik isumaqatiginninniarneq aallartissimavaa, tassa partiip Naleraq suleqatiginiarunnaarmagu.
- Pingasunngormat Demokraatit attaviittorlu Palle Jerimiassen ataatsimeeqatigaavut. Isumaqatiginninniarnerit ingerlalluarsimapput, suullu tamarmik inissinneqarlutik. Palle Jerimiassenili ataatsimiinnermit anivoq, oqarlunilu kingusinnerusukkut uteqqikkumaarluni, Sakio Fleischer (S) Sermitsiaq.AG-mut oqaluttuarpoq.
Minik Høegh-Dam partiimit anisitaammalli Avannaata Kommuniani taanna borgmesterissatut aalajangiunneqarsimagaluarpoq.
Isumaqatigiissummik qimarratiginnittoq
Siumut Demokraatillu ataatsimiinnerup ingerlaqqinnissaa siunertaralugu Palle Jerimiassen utaqqisimavaat.
- Nalunaaqquttap akunnerini marlunni utaqqigaluariarluta ataatsimiinneq unitsipparut. Unnukkut Palle Jerimiassenimit nalunaarfigineqarpunga, tassani oqaatigaa borgmesterinngornissamut partiinit allanit neqeroorfigineqarsimalluni, taamaammallu isumaqatigiissutitsinnit tunuarluni. Demokraatit Palle Jerimiassenilu Siumumik suleqateqarnissamut atsioreeraluarput, Palle Jerimiassenili isumaqatigiissummik qimarratiginnippoq. Tamanna assorsuaq pakatsinarpoq, Sakio Fleischer oqaluttuarpoq.
Qinersisartunik ataqqinninnginnerusoq
Taamaalilluni attaviittoq Palle Jerimiassen Avannaata Kommuniani borgmesteritut ingerlaqqittussanngorpoq. Sakio Fleischerip nuannaringilaa, Inuit Ataqatigiit, Atassutip, Naleqqap Palle Jerimiassenillu Siumut avaqqullugit isumaqatigiissuteqarsimanerat. Taamaalillutik Palle Jerimiasseni partiillu allat kommunalbestyrelsimi 17-inik inuttaqartumi qulingiluaallutik amerlanerussuteqalerput.
- Politikki taamaappoq. Siumulli kommunimut qinersisoqarmat taaguunneqarnerpaasimavoq, unneqqarissumillu isumaqatiginninniarsimalluni. Siumut isumaqatigiissummut ilaatinneqanngimmat partiit sisamat pineqartut qinerisartunik ataqqinninngillat, Sakio Fleischer oqarpoq.