Skip to main content

Saattuaqassuseq pitsanngoriaateqartoq

Nunatta imartaani saattuaqassuseq ukiut arlerlugit ajortumik inissisimasinnarluni maannakkut pitsanngoriaateqalaalaarsimavoq

Saattuaqassuseq maanna pitsanngoriartorpasippoq.

Aqutsiveqarfinni tamangajanni ukiut arlerlugit piisatsitsisoqareerluni ukiormanna 2015-imi appariartortuartoqarsimanera sumiiffiit ilaanni illuanut saariarsimarpasippoq – matumani aqutsiveqarfiit Sisimiut aamma Nuuk-Paamiut eqqarsaatigineqarlutik. 

Malinnaaffigineqassasut
- Taammaattorli pineqartuni pitsaap tungaanut saariartoqarsimanera ukiuni aggersuni taamaaginnarsinnaanissaa soorunalimi ilisimaneqanngilaq, Pinngortitaleriffimmi ilisimatooq AnnDorthe Burmeister tusagassiorfinnut nalunaarummi allappoq.

Taanna oqarpoq, taamaammat saattuaqassutsip siunissamissaaq aalaakkaasumik inuussutissarsiutigineqarsinnaanissaa qulakkeerniarlugu sumiiffiit peqarfiusut malinnaaffigineqaannavittariaqaraluarput.

Sisimiut eqqaanni saattuarniarfiusartuni saattuarniarnermit aammalu biologit misissuisarnerinit paasissutissat pissarsiarineqartut takutippaat pineqartuni peqassuseq 2009-miit 2014-imut appariartuinnavissimasoq. Taamaattoqarneralu 2015-imi unissimavoq, takussutissaqarporlu peqassuseq siuariartulaalersimasoq.

Amerleriarsinnaasut
- 2016-imut pisassiissutit 300 tonsiusut ilaneqaratik attanneqarsinnaassappata amerleriarsinnaanissaannut periarfissarissaarnerulissaaq siunissamilu aalaakkaanerusumik iluaqutiginiarneqarsinnaalissallutik, 
AnnDorthe Burmeister ilanngullugu oqarpoq.

Pinngortitaleriffik aqutsiveqarfimmi Nuuk-Paamiumi misissuinernik ingerlataqarsimanngilaq, taamaammallu tamaani peqassutsimik paasisassarsiorsimanerit paasissutissanik pissarsiffigisamit ataasiinnarmit toqqammaveqarput, tassalu saattuarniartartut nalunaarsuutaannit.

Ilanngullugu ilisimatitsissutigineqarpoq, nalunaarsuutit misissornerinit peqassuseq aalaakkaasumik inissisimasut isikkoqarsorinarpoq. Sinerissap qanittuanut pisassiissutigineqarsinnaasutut innersuussutigineqarput 200 tonsit avataanullu 1.000 tonsit pisassiissutigeqqinneqarnissaat innersuussutigineqarluni.

Ikilineqartariaqartut
Pinngortitaleriffiup saattuat pillugit siunnersuisarnermigut saattuakilliartornera pakkersimaarniartarsimavaa. Saattuat amerliartussappata aqutsiveqarfinni ataasiakkaani pisarineqartartut pisassiissutigineqarsinnaasutut innersuussutigineqartunit suli ikinnerutinneqartariaqarput.

Ilanngullugu Pinngortitaleriffiup innersuussutigaa saattuarniartarneq qaammatit martsip naaneraniit juulip qeqqata tungaanut aqutsiveqarfinni tamani ingerlanneqartarnissaa, taamaaliornikkut saattuanik 'qituttunik qalerualinnik' avammut eqqaaginnartarneq ingalassimaneqarsinnaammat saattuaqassutsimillu atorluaanerusoqalerluni.

Aamma atuaruk: Umiatsiaararsorluni assagiarsunniarnissaq akuerineqartoq

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER