Saarullittassiissutit innersuussutigineqartunit marloriaataassapput

Kitaani sinerissap qanittuani aappaagu saarullittassat Pinngortitaleriffiup innersuutaannit marloriaataannit amerlanerussapput. Naalakkersuisummi decembarip arfernani ataatsimiinnerminni aalajangerput aalisagartassiissutit 30.000 tonsiussasut.

Saarulliit sinerissap qanittuani amerlassusaat kalluarneqassanngippat, aalisagartassiissutit 14.500 tonsiussasut, uumasorsiuut nalilerpaat. Uumasorsiuullu qulanngilluinnarput kitaani saarulliit amerlassusaat pillugu.

- Suleriut nutaaq atulernikuuarput, taamaasilluta paasissutissat tamakkiisut atorsinnaalerlugit, qularnaatsumillu innersuussisinnaalluta, Pinngortitaleriffimmi ilisimatooq, Rasmus Hedeholm oqarpoq.

Saarulliit uumasoqatigiiaat assigiinngitsut sinerissap qanittuani pisarineqartarput. Soorlu saarullik sinerissap qanittuaniittoq kangerlunni suffisartoq. Aammali saarulliit avataaniittut sinerissap qanittuanukartarput.

Suffinikippallaartut

Uumasorsiuut innersuussutigigaluarpaat sinerissap qanittuani saarullittassat aappaagu 6.806 tonsiussasut.

- Sinerissap qanittuani saarullinniartut saarulliit uumasoqatigiiaannit allaneersut pisarisarpaat, Pinngortitaleriffiullu nalilerpaa sinerissap qanittuani saarullittassat 14.500 tonsiuppata, taava imaassasoq saarulliit sinerissap qanittuaniittut 6.806 tonsit pisarineqassasut. Ima paasillugu, sinerissap qanittuani aalisagartassat qaluneqartut affaata missaat tassaasussaapput saarulliit uumasoqatigiiaat allaneersuusut, Rasmus Hedelund nassuiaavoq.

Sinerissap qanittuani saarulliit ukiuni kingullerni ingerlalluarput, aalisartullu piffissap sivikitsup ingerlanerinnaani saarullinnik pisaqarluartarlutik. Ajornartorsiutaavorli saarullit suffinikittarneri.

- Saarulliit suffisarneri 2010-mili annikilliartorpoq. Ukiuni kingullerni saarulleqarluaraluartoq, ukiut tullii saarullikinneroratarsinnaavoq, Rasmus Hedeholm nassuiaavoq.

Aalisakkat pisarineqarluartartut

Taamaattoqaraluartoq aalisarneqartut ukiuni kingullerni amerliartuinnarput, ukiullu 25-ini kingullerni ukiut marluk kingulliit aatsaat taama pisarineqartigisarlutik.

- Uumasoqatigiiaat ikiliartorput, suffisarnerit annikillisut, aalisarnerujussuarlu tassani pissutaapput, Rasmus Hedeholm oqarpoq.

Pinngortitaleriffiup siunnersuutaani ima nassuiarneqarpoq:

- Aalisakkat toqusartut amerlaneri taamatullu suffinerit annikillineri kinguneraat 2014-imiilli uumasut ikinnerulernerat (saarulliit tamarmiusut amerlassusaat, aaqq.), allassimavoq.

- Maluginiarneqartariaqarpoq taama annertutigisumik ukiuni tulleriinni ataannartuni aalisarnerup oqaluttuarisaaneq qiviaraanni saarullinnit nammanneqarsinnaanngitsoq, Pinngortitaleriffik innersuussummini allappoq.