Aalisarneq
Saarullittassat amerlineqarnerat SIK-mit nuannaarutigineqarpoq
Tamatumunnga ilutigitillugu SIK-mi sulisitsisunut aamma inuiaqatigiinnut inassutigineqarpoq illugiilluni oqaloqatigiittoqarnissaa, tamatumuunakkut sulisartunut ukioq kaajallallugu aalaakkaasumik suliassaqartitsinissamut killiliussatut piumasaqaatit pilersinniarlugit
SIK-mit aalaakkaasumik sulisut suliassaqartinneqarnissaat kissaatigineqarpoq, taamaattumillu SIK-mit sinerissami qanittumi aalisartunut saarullinnit pisassiissutigineqartut qaffannissaannut siunnersuut qujarunneqarpoq neriuutigalugu tamatuma ukiup sinneranut ilaasortatsinnut suliassaqartitsiumaartoq.
- Kisianni tamatumunnga ilutigitillugu takuavut Qasigiannguani aalisakkerivimmi sulisartut 30-t angerlartinneqarsimasut Royal Greenlandip aalisakkerivianut qalerallit tulaanneqartut ikisimanerat pissutigalugu. Tamanna uagut ilaasortatsinnik eqquivoq juullimut qaammat ataasiinnanngortoq suliffissaarummata, tamanna naleqqutinngitsutut isigaarput, SIK-mi siulittaasoq Jess G. Berthelsen tusagassiorfinnut nalunaarummi oqarpoq.
Atuaruk: Tunisassiorfimmi sulisut amerlasuut angerlartinneqartut
Suleqatigiinnissamik kissaateqartoq
Tamatumunnga ilutigitillugu SIK-mi sulisitsisunut aamma inuiaqatigiinnut inassutigineqarpoq illugiilluni oqaloqatigiittoqarnissaa, tamatumuunakkut sulisartunut ukioq kaajallallugu aalaakkaasumik suliassaqartitsinissamut killiliussatut piumasaqaatit pilersinniarlugit.
Tassami maannakkorpiaq Qasigiannguani suliamik ingerlatitsisoqarpoq Royal Greenlandimi sulisitsisut oqaloqatigineqarlutik, aamma kommunimi politikeri oqariartuuteqarpoq tamanna aasarli siumut takorloorneqarsinnaasimagaluartoq tassa qalerallit amerlangaatsiartut kasiilerneqarmata.
Taamaattumik tamanna SIK-mi Royal Greenlandimut oqaloqatigiissutigineqarusuppoq, suleqatigiinnissarli inassutigineqarluni.
Atuaruk: Kommunimi politikeri: Qasigiannguani tunisassiorfik aaqqiivigisiuk
Royal Greenlandimik oqaloqatiginninneq
- Royal Greenlandilu oqaloqatigiippugut qanoq ilaasortavut piffissap ilaani suliassaminnik qulakkeerissunneqarsinnaanngitsut, aalisakkanik tulaassisarnerup nikerarneranik siumut takorloorneqarsinnaanngitsumik patsisilimmik, taava taakku pikkorissartinneqarsinnaasut piginnaanngorsarlugit tamannalu aqqutigalugu suliassaat qulakkeerneqarlutik imaluunniit ilinniartitaanissaat, Jess G. Berthelsen erseqqissaavoq, nangillunilu:
- Neriuutigaarput suleqatigiinneq tamanna siunissami kinguneqarluarumaartoq aamma sulisitsisunut inassutiginiarparput akisussaaffimmut nammaqataaqqullugit ilaasortatsinnik aalaakkaasumik suliassaqartitsinissamik pilersitsinissamut.
'Aningaasanut inatsimmit tapiigitsi'
Sulisitsisut aningaasanut inatsimmi sulisartut pikkorissarnissaannut aningaasanik qinnuteqaateqarnissaminnut periarfissaqartut, taanna oqarpoq.
- Taamaattumik uagut siunissaq eqqarsaatigalugu iliuuseqarpugut illugiilluni oqaloqatigiinnissaq aamma pitsaanerusumik suleqatigiinnissamik pilersitsiniarluta, sulisartunut suliffeqarfinni aalaakkaasumik aamma toqqissisimanartumik killiliussanik pilersitsiniarluta aammattaaq aalisarnermik inuussutissarsiuteqarnermi. Sulisartunummi ataasiakkaanut assorujussuaq pingaaruteqarpoq ilaqutanik ukioq kaajallallugu pilersuisinnaanissaq.