Aalisarneq
Saarullittassat 8.000 tonsinik amerlineqarput
Pisassiissutit biologit siunnersuinerannit pingasoriaatingajammik amerlanerupput
Saarulllittassat 8.000 tonsinik amerlineqarput. Aalisartut aqagu tallimanngornermiit immikkut pisassiissutinik aalisalereersinnaapput. Taamatut tusagassiorfinnut nalunaaruteqarluni paasissutissiivoq aalisarnermut, piniarnermut nunalerinermullu naalakkersuisoqarfik.
Tusagassiorfinnut nalunaarummi allassimavoq pisassat qaffanneqartut naalakkersuisuni ´peqqissaartumik isumaliutigereerlugu nalilersoreerlugulu´.
– Naalakkersuisut pisassanik qaffaaniarnerminni nunatta imartaani saarulleqassusia pingaartissimavaat.
Siunnersuinermit 2,7-eriaammik
Saarullittassat amerlinerisigut ukioq manna pisassiissutit 33.000 tonsinngorput. Pinngortitaleriffiup inassutigisimavaa 12.379 tonsinik pisassiisoqassasoq. Taamaasilluni pisassiissutit pinngortitaleriffiup inassuteqaataanit 2,7-eriaammik amerlanerupput.
– Pisassat amerlineqarnerannut atatillugu Naalakkersuisut arlalinnik suliniuteqarniarput Kitaani sinerissamut qanittumi saarullinniarneq pitsaasoq pissarsiffiulluartorlu attatiinnarniarlugu, tusagassiorfinnut nalunaarummi ilanngullugu allassimavoq.
– Ilaatigut Pinngortitaleriffik suleqatigalugu nalilerneqassaaq sinerissamut qanittumi aalisarnermi eqqissisimatitsinissamik iliuutsit, soorlu saarulliit suffineranni suffisarfiini eqqissisimatitsinerit assigisaallu, saarulliit amerlassusaata ineriartorneranut pitsaasumik sunniuteqarsinnaanersut.