Saarullinniat assigiimmik atugassaqartinneqarusuttut
Saarullinnik tunisinermi akit sumiiffiit ilaanni qaffariangaatsiartut sumiiffiit ilaanni akit nikinngillat. Sinerissallu qanittuani aalisartut assigiinnerusumik atugassaqartinneqartariaqartut aalisartut aamma KNAPK isumaqarput.
Saarullinniarneq sinerissap qanittuani aalisartut aningaasaqarnerannut pingaaruteqarluinnarpoq, ukiunili kingullerni corona pissutaalluni nunarsuarmi aningaasarsiornerup annertuumik eqqugaanerata kingunerisaanik, saarulliit akiisa appariarussuarnerat aalisartunut annertuumik eqquinerluppoq. Qaammatinili kingullerni sumiiffiit ilaanni saarullinnik tunisinermi akigitinneqartartoq malunnaatilimmik qaffariarpoq, tamannalu umiatsiaararsortut inuuniarnikkut atugaannik oqinnerulersitsivoq.
Aviisi Sermitsiaq taama allappoq.
Sumiiffiilli ilaanni tunisinermi akit suli appasippallaarnerat pissutigalugu saarullinniarneq imminut akilersinnaanngilaq. Sinerissallu qanittuani saarullianermik inuussutissarsiuteqartunut assigiinnerusumik atugassaqartitsisoqartariaqartoq aalisartut aamma Kalaallit Nunaani Aalisartut Piniartullu Kattuffiat, KNAPK, isumaqarput.
Akit assigiinngitsut
Royal Greenland A/S KNAPK-lu aalisakkanik tunisinermi akit pillugit isumaqatigiissuteqanngillat, saarulliillu qanoq akeqartinneqarnissaat Royal Greenland A/S-ip nammineerluni aalajangertarpaa. Royal Greenlandilli akigititani avammut saqqummiunneq ajorai, Royal Greenland A/S-imi Attaveqarnermut Sulisoqarnermullu Pisortaq, Jens K. Lyberth oqarpoq.
Aviisimi Sermiatsiami atuarnerusinnaavutit. Aviisi uani pissarsiarisinnaavat:
