Skip to main content

Saammaateqatigiinnissaq soqutigineqarpianngitsoq

Saamaateqatigiinnermut Isumasioqatigiissitaliap Narsami innuttaasunik ataatsimiititsinerani peqqinnissaqarfiup pitsaassusia kiisalu sumi inunngorsimaneq tunngavigalugu akissaasersuineq oqaluuserineqarput

Peqqinnissaqarfiup pitsaassusia.

Akerleriissutaasorlu sumi inunngorsimaneq tunngavigalugu akissaasersuineq.

Taakkua marluk sisamanngormat unnukkut oqaluuserineqarput Saammaateqatigiinnermut Isumasioqatigiissitaliaq Narsami 11-nik peqataaffigineqartumik innuttasunik ataatsimiititsimmat.

Suliaralugit

Oqallinnerup aallartinnginnerani isumasioqatigiissitaliami ilaasortat Josef Therkildsenip Ida Mathiassenillu isumasioqatigiissitaliap suliaanut tunuliaquttat oqaluttuaraat.

Saammaateqatigiinneq pisariaqarsinnaavoq inuit, G-60-ip politikkata ilaatut pinngitsaalisamik nunaqarfimmit illoqarfimmut nuutsinneqarnermik kingorna, assersuutigalugu itisuumik kinguneqarnerlutsitsisimappata.

Anguniagaavoq misigisat tamakkua suliarinissaat, inuit inuunerminni ingerlaqqinniassammata.

Misigisat pitsaanngitsut

Pisimasut marluk, tusarnaartut saqqummiussaat peqqinnissaqarfimmut tunngassuteqarput.

Tusarnaartoq ataaseq misigisimasimavoq peqqinnissaqarfimmit assigiinngisitaasimasorujussuulluni, tikkuarlugulu ilaquttami qaniginerpaasami ilaat kukkusumik katsorsarneqarsimasoq.

´Uumasutut misiliutitut´

Peqataasut ilaat oqarpoq qanga arnat naartulersut iisartakkanik naartunaveersaatinik tunineqartarsimasut.

Iisartakkat tamakkua, peqataasoq oqarpoq, uumasunut atugassatut naatsorsuussaasimapput. Arnalli tamatuminnga paasitinneqarneq ajorput, taamaattumik piumassuserinngisaminnik ´uumasutut misiliutaasimapput´, taannalu naapertorlugu arnat arlallit iisartakkanik atuinermik kingorna kinguaassiorsinnaajunnaarsimapput.

Isumasioqatigiissitaliami ilaasortat marluk, Josef Therkildsenip Ida Mathiassenillu akissumminni peqqinnissaqarfimmut maalaaruteqarnissamut periarfissaasinnaasut tikkuarpaat.

Sumi inunngorsimaneq tunngavigalugu akissaasersuineq

Peqataasoq alla isumaqarpoq sumi inunngorsimaneq tunngavigalugu akissaasersuineq suli atugaasorujussuusoq.

Taassuma takusarsimavaa qallunaat tikisitat ajunngitsorsiassaqartinneqarlutillu pisinnaatitaaffeqartinneqartut, sulisunut kalaallinut atugaritinneqanngitsunik.

Sumi inunngorsimaneq tunngavigalugu akissaasersuineq ilaatigut pisortani atugaavoq, annertunerusumilli ingerlatsivinni namminersorluni, peqataasoq oqarpoq, taannalu isumaqarpoq tamanna ingerlaannavik atorunnaarsinneqartariaqartoq.

Assigiinngisinneqanngilaq

Akerlianik arnaq ataatsimiinnermi peqataasoq oqaluttuarpoq Danmarkimi inunngorsimalluni, arnialu kalaaleq ilagalugu Kalaallit Nunaannut nuussimalluni.

– Assigiinngisinneqarnerlu misigisimanngisaannarpara, Danmarkimi Kalaallilluunniit Nunaanni, taanna oqarpoq.

Ataatsimiinneq naggaserlugu isumasioqatigiissitaliamut ilaasortat neriorsuipput saqqummiunneqartut isumasioqatigiissitaliap suliaanut ilanngunneqarumaartut.

Assigiinngitsorujussuit

Saammaateqatigiinnermut Isumasioqatigiissitaliaq innuttaasunik ataatsimiititsigaangat peqataasut amerlassusaat assigiinngitsorujussuusarput. Peqataasut agguaqatigiissilugu 25-iusarput. Ataatsimiititsinermi peqataasut amerlanerpaat 45-uusimapput, ikinnerpaallu sisamaasimallutik, ataatsimiititsineq Narsarsuarmi ingerlanneqarmat.

Ataatsimiititsinerni saqqummiunneqartut ilaat pingaartumik tassaasarput tunumiutut- avannaamiutut kitaamiutullu oqaatsitigut ajornartorsiutit, kiisalu innuttaasut kalaallisut oqaluttut akornanni assigiinngisitsisarnerit, minnerunngitsumik illoqarfimmiut nunaqarfimmiullu akornanni, isumasioqatigiissitaliami ilaasortat taakkua marluk paasissutissiipput.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER