Skip to main content

S aamma D: Akitsuutit 'peqqinnerulernissamik siunertaqarput'

Inatsisartut aningaasanut akileraartarnermullu ataatsimiititaliap akitsuutit pillugit allannguutissatut siunnersuutit piaartumik suliarai. Ataatsimiititaliaq tupaallannanngitsumik isumaqatigiinngilaq.

Akitsuutit aningaasanut inatsimmik matussusiisussat aamma peqqinnissamut iluaqutaassapput. Amerlanerussuteqartut taama isumaqarput.

Inatsisartuni aningaasanut akileraartarnermullu ataatsimiititaliap akunnerup ataatsip ingerlanerani allannguutissatut siunnersuutit, tassa biilit innaallagialersorneqartartunut akitsuusiinissaq aamma nioqqutissat arlallit eqqunneqarnerminni akitsuuserneqartarnissaat suliaraat isumaliutissiillutillu.

Siunnersuutit Inatsisartunut ullumi 11:04 saqqummiunneqarput, suliallu ullumi naammassineqartussaammata suliat siullermeerneqarneranit aappassaaneerneqarnerata tungaanut ataatsimiissutigaat.

Akitsuutilli pillugit ataatsimiititaliaq isumaqatigiinngilaq.

Amerlanerussuteqaqqalaarneq

Ataatsimiititaliami ilaasortaasut arfineq-marluusuni sisamat, Siumut aamma Demokraatit, siunnersuutit akuerisassanngorlugit innersuussutigaat. Ilaasortalli sinneruttut pingasuusut, Inuit Ataqatigiinneersut Partii Naleqqameersullu siunnersuutit itigartitsissutiginissaat innersuussutigaat.

- Inuinnaat akileraarutitigut akitsuutitigullu minnerpaamik 200 milliuunit koruuninik annertunerusumik nammakkernissaat ikinnerussuteqartut akerleraat, siunnersuutimmi marluk taaneqartut akuerineqarnerat taama kinguneqassammat. Siunnersuutit saqqummiunneqartut pissakinnerusunik eqquinerussapput. Nassuiaatini paasissutissiissutigineqarpoq inuussutissarsiortut nioqqutissanit iluanaarutissaminnik qaffaanissaat ilimanartoq, tamannalu suli sakkortunerusumik eqquissaaq, tassa akitsuutitigut qaffaatit 200 milliuunit koruunit saniatigut, ataatsimiititaliami ikinnerussuteqartut isumaliutissiissummi allapput.

- Siunnersuutit taakku marluk 2020-mi aningaasanut inatsimmi aningaasaliissutissatut pisariaqartitanik matussusiipput. Tamatuma saniatigut siunnersuutit peqqinnerulernissamik siunertaqarput. Taamaalillunilu nioqqutissanik arlalinnik peqqinnermut innarliisinnaasunik, soorlu sukkunik, tupanik imigassamillu aalakoornartortalimmik atuinerup appartinnissaanut siunnersuutit naleqquttutut isigineqarput, tamannalu pitsaasutut isigineqarpoq. Kiisalu amerlanerussuteqartunit maluginiarneqarpoq iluanaarutaanerusussat sinneruttut ingerlatseqatigiiffiit akileraarutaannik appartitsinissamut atorneqalersaartut, aningaasanut akileraartarnermullu ataatsimiititaliami amerlanerussuteqartut allapput.

Tusarniutigineqanngilaq

- Aningaasanut inatsisissaq pillugu isumaqatigiissuteqarnermut atatillugu suliarineqarnertik pissutigalugu siunnersuutit tusarniaassutigineqarsimanngillat. Kiisalu nioqqutissat aalajangersimasut akitsuutaasa qaffaatissaattut siunnersuutigineqartut kingunerisinnaavaat nioqqutissanik taakkuninnga amerlasuunngorlugit pisiniarneq, tamannalu ilaatigut siunnersuutip iluanaarutaanissaanik annikinnerusumik pinngitsoortitsisinnaavoq ilaatigullu peqqinnissaq eqqarsaatigalugu sunniuteqarnerlussinnaalluni, siunnersuutit aappassaaneerneqannginnerani ataatsimiititaliaq isumaliutissiivoq.

Akitsuutinit ukiut sisamat ingerlaneranni 200 milliuunit koruuninik iluanaartoqassaaq. Iluanaarutissarli annikinneroratarsinnaavoq innuttaasut mamakujuttunik, tupanik imigassanillu pisisarnerat annikillissappat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER