Rutkjær nunanut allanut unammisartunut sungiusaasutut ingerlaqqissaaq
Nunatsinni isikkamik arsaanneq pitsaasumik ineriartorpoq, taamaammat KAK-ip nunanut allanut unammisartunut sungiusaasumut Morten Rutkjærimut isumaqatigiissutertik sivitsorpaat, isumaqatigiissullu sivitsorneqaqqinnissaanik periarfissaqartillugu.
Morten Rutkjær KAK-lu nunanut allanut unammisartunut sungiusaasuuneq pillugu isumaqatigiissummik sivitsuipput. Morten Rutkjær angutit silami isikkamik arsaattartut, nunanut allanut unammisartunut 31. juli 2023-p tungaanut sungiusaasutut isumaqatigiissuteqarpoq. Isumaqatigiissulli ukiunik marlunnik maanna sivitsorneqarpoq, tassa 31. juli 2025 tungaanut, sivitsorneqaqqinnissaanut periarfissaqartillugu.
KAK taama tusagassiorfinnut nalunaaruteqarpoq.
Morten Rutkjær Danmarkimi divisionimi arsaattartunut sungiusaasuusimasoq, august 2020-mi nunatsinnit nunanut allanut unammisartunut sungiusaasunngorpoq.
- Suleqatigiinnerup sivitsorneqarnera nuannaarutigeqaara. Kalaallit Nunaanni isikkamik arsaannermi ineriartortitsinerput pitsaalluinnarpoq. Ineriartortitsinissamik anguniagaq ukiut marluk qaangiupput aallartikkatsigu, maanna annertusaanissaq tullinnguuppoq, Morten Rutkjær oqarpoq.
Meeqqat inuusuttullu arsaatilissapput
KAK ilisimatitsivoq suleqatigiinnermik sivitsuinermut tunngavilersuutit pingaarnerit ilagigaat meeqqat inuusuttullu isikkamik arsaannermik aallussilernissaannut sungiusaasup takorluugaqarnera.
Nunanut allanut unammisartunut sungiusaasup ilisimatitsissutigaa nunatsinni illup iluani isikkamik arsaaffinnik sanaartortoqarnissaanik suliniuteqartitsissalluni, suliniullu Nuummi siullermik aallartinneqassasoq. Isikkamik arsaaffiit pitsaasut pigigaanni, isikkamik arsaanneq pitsaasumik ineriartortinneqassaaq, kiisalu meeqqat inuusuttullu aamma peqataatinneqarnerusinnaallutik, taanna isumaqarpoq:
- Isikkamik arsaanneq annertusassavarput, nunanut allanut unammisartut, peqatigiiffiit pingaartumillu meeqqat inuusuttullu ukioq kaajallallugu isikkamik arsaassinnaannerannut periarfissat pitsaanerulersissavagut. Ukiuni tullerni angusat pitsaanerulersinnaapput, tamanullu iluaqutaassalluni.
- Kalaallit Nunaanni isikkamik arsaannerup siunissagissaarnera upperaara, Morten Rutkjær oqarpoq.