Russit umiarsuaat alla coronamik eqqugaasimalluni aamma Savalimmiuniittoq
Russit umiarsuaanni Yantarnyymi inuttanit 77-init 29-t coronaqarput. Inuttat Savalimmiuni misissortinnerminni tunillatsissimanerat paasineqarpoq nunaliaqqusaajunnaarlutillu. Savalimmiuni umiarsuit nunanit allaneersut pingajussaat coronaqarfiuvoq.
Russit kilisaataat Yantarnyy Kollafjørðimut aggustip 23-ani tikinnginnermini oqartussanut ilimasaarivoq. inuttat marluk coronamik tunillatsissimanermut ersiuteqartut.
Taamaammat inuttat tamarmik misissorneqarput. Tunillatsissimasunit 29-nit marluk napparsimmavimmut unitsinneqartut, Savalimmiuni peqqinnissaq pillugu oqartussat paasissutissiipput. Russit kilisaataat, Yantarnyy, juulimi aamma Klaksvíkimiissimavoq.
Umiarsuarni nunanit allaneersuni marlunni, russit Litauenimiullu umiarsuaanni, juulip naalernerani Klaksvikimut tikittuni aamma tuniluunnersuaqarpoq. Inuit pingasut napparsimmavimmi uninngareerput, taamaammallu maanna Savalimmiuni uninngasut katillugit tallimanik amerlassuseqalerlutil. Uninngasut ilaat marluk peruluttunut immikkoortortami passunneqarput.
- Tunillatsissimasut ikiorneqarnissamik pisariaqartitsisut arlaqarnerunissaat ernummatigaarput, tamannalu napparsimmaveqarfimmut artukkiisinnaavoq, nappaatinut tuniluuttunut ataatsimiititaliap siulittaasua, Michael Boolsen, Savalimmiuni nutaarsiassaqartitsivimmut Kringvarp Føroyamut oqarpoq.
Angerlartariaqaraluartut
Nunap nakorsaanera Lars Fodgaard Møller oqarpoq, Ruslandimut timmisartukkut attaveqaammik pilersitsisoqaraluarpat tamanna pitsaanerpaassagaluartoq, inuttat ingerlaannaq angerlarsinnaaniassammata. Savalimmiunili oqartussat inuttat aallaqqunisaannut piginnaatitaaffeqanngillat.
Nunap nakorsaanera paasissutissiilluni oqarpoq, inuttat umiarsuarnut allanut marlunnut juulimi coronamik eqqugaasunut sanilliullugit suleqatiginnikkumassuseqarnerujussuusut. Umiarsuit taakkua marluk aallaqqinnissartik toqqarsimavaat.
Ulluni pingasuni tunillatsittoqanngitsoq
Savalimmiut aggustip aallartinnerani coronap tuniluunneranit annertuumit eqqugaavoq, tamannalu aggustip 5-ani qaffasinnerpaaffeqalerpoq, tunillatsissimasut 38-t paasineqarmata. Oqartussat taamanimiit tunillatsissimasut ikilisinniarlugit tamaviaarsimapput, tamannalu aallaqqaammut iluatsissimasoq ilimanaateqarpoq. Ullunimi kingullerni pingasuni tunillatsissimasunik nutaanik paasisaqartoqanngilaq, taamaallaat russit umiarsortut taakkua ikaartaammilu Norrønamiittut marluk minillugit.
Ikaartaammi ilaasut marluk Hirtshalsimi Norrønamut ikisimapput. Taakkua ikaartaammi mattusimaneqarput. Kikkut tamarmik aallannginnermi misissorneqartarput, ilaasullu akissutisinissamik tungaanut mattusimasartussaallutik.