Russit sakkui elektroniskiusut Norgemi radarinut akornutaasut
Russit sakkutuuisa umiarsuaanni atortut elektroniskiusut milerarneqarnerat Norgep avannaarsuani radiunut radarinullu akornutaasimannguatsiarput
Finmarkenimi Norgep avannaarsuaniittumi radiut radarillu piffissami kingullermi akornusersorneqarsimapput. Akornusersorneqarnerannut pissutaasimavoq russit Avannaanni sakkutuuisa imarsiortut sakkuminnik radio-teknikkiusunik Barentshavemi misileraanerat. The Barents Observer, NTB innersuussutigalugu, allappoq.
Radarit sorlliit sunnerneqarsimanersut imaluunniit radiup maligaasai sorliit akornuserneqarsimanersut pillugit erseqqissumik tamanut tusarliussisoqarsimanngilaq.
Pingasunngormat russit Avannaani sakkutuuisa imarsiortui nalunaaruteqarput umiarsuaq nutaaq 'Admiral Kasatonov' Severomorskimit aallarsimasoq.
Umiarsuup sakkuisa sakkutuunut imarsiortunut tunniunneqannginneranni misilerarneqartarnerat nalinginnaasuuvoq.
Barents Observer naapertorlugu Avannaani sakkutuut imarsiortut angallataannit timmisartut tigisittarlugit Kolahalvøllu sineriaani timmisartut illersuutaasut atortui elektroniskiusut misilerarneqarsimapput.
Barents Observerimit siusinnerusukkut oqaluttuarineqarsimavoq, Ruslandip issittortaata sineriaani teknikkikkut atortorissaartupilussuarnik sakkunik inissiisoqarsimasoq, timmisartut umiarsuillu radiuinik kilometerinik tusintilikkaanik ungasitsigisumiittunik akornusersuisinnaasunik.