Rusland: Issittumi nukik ataavartoq annertunerussaaq
Issittumi nukimmik ataavartumik ineriartortitsinissamut periarfissaqarluarpoq. Tamanna Ruslandimi Nukissiuuteqarneq pillugu sapaatip-akunnerani ataatsimi ataatsimeersuartoqarnerani erseqqissaatigineqartunut ilaavoq.
Rusland Isittumi nukimmik ataavartumik ineriartortitsinissami atuutilersitsinissamillu annertuumik soqutigisaqarpoq. Ruslandimi Nukissiuuteqarneq pillugu sapaatip-akunnerani ataatsimi ataatsimeersuartoqarnerani periarfissat arlallit oqaluuserineqarput, ilaatigut anorip seqernullu nukingi aamma CO2-mik aniatitsineq annikinnerusoq pingaartillugit sammineqarlutik.
Ruslandip 2060-imi CO2-mik aniatitsiunnaarsimasussatut anguniakkaminik angusaqarusunnera erseqqissaatigineqaqqippoq.
CO2-mik annikinnerusumik aniatitsilernissamik nukissiuutinillu ataavartunik ineriartortitsinissamik anguniakkat angusinnaajumallugit Rusland Issittumi Siunnersuisoqatigiinni suleqatimi suleqatiginissaannut piareersimavoq. Rusland ataatsimiinnermi kingullermi Issittumi Siunnersuisoqatigiinni siulittaasuuffimmik isumaginnittunngorpoq.
- Ruslandip Issittortaata nunarsuarmi naalagaaffimmilu aningaasaqarnermut annertusiartuinnartumik atuuffeqaleriartornera akuerisariaqarparput. Nunap immikkoortua nunarsuarmi pilersuinermi allannguutinik tunngaveqarpoq, silallu pissusianut sunniuteqanngitsumik aningaasaqaleriartuaarnerput ilutigalugu isumalluutit Issittumi naammattorsuarmik pigineqartut piumaneqaleriartuinnarnissaat takusalissavarput. Teknologiit periaatsillu pigeriikkavut atuutilersinniarlugit suliassarpassuaqarpoq, Ruslandip Issittumi Siunnersuisoqatigiinni suleqatini suleqatigalugit suliarisinnaasaanik, Ruslandimi nunanut allanut ministereqarfimmi aallartitaq, Nikolay Korchunov, oqarpoq.
Issittoq periarfissarpassuaqarpoq
Rusland aviisimut Sermitsiamut oqaluttuarsimavoq, Kalaallit Nunaata arlalitsigut qanimut suleqatiginissaa soqutigigitsik. Ilaatigut nukimmik ataavartumik, Kalaallit Nunaannit aamma pingaartinneqartorujussuusumik, ineriartortitsinissaq soqutigineqarpoq.
Ruslandip issittortaani innuttaasumut ataatsimut nukimmik atuinerup nuna tamakkerlugu agguaqatigiissillugu atuinermiit 15-eriaammik qaffasinneruneranik missingiineq ataatsimeersarnermi erseqqissaatigineqarpoq, tamaani nukimmik mingutsitsinngitsumik nunap sinneranisut annertutigisumik ineriartortinneqarsimanngimmat. Tamatumanilu peqataasut isummerput, nukik ataavartoq siumut aqqutissaasoq.
- Silap pissusianut tunngasuni avatangiisinullu tunngasuni unammilligassanut akissutissaq tassaasariaqarpoq teknologiinik nutaanik, sunniutinik inuit pilersitaannik annikillisitsinissamik siunertaqartunik, aamarsuarnik atuiunnaariartuaarnerup iluani ineriartornermik siuarsaanissamik taamatuttaarlu nukissiuutinik ataavartunik siuarsaanermik pingaartitsilluni aallutaqarneq, Ruslandip kangianik ungallermik Issittumillu ineriartortitsinermut immikkoortortaqarfiup aqutsisua, Soslan Abisalov, ataatsimeersuarnermi ilaatigut oqarpoq.
”Issittumi aamarsuarnik atuiffiunngitsumik angusaqarniarneq” qulequtaralugu niuerneq tunngavigalugu ullaakkorsioqatigiinneq ataatsimeersuarnermi aamma ingerlanneqarpoq. Peqataasut inuit ingerlataannit sunniutit annikkillisarnissaannut periaasissat eqqartorpaat, pingaartumillu Issittumi CO2-mik aniatitsineq tamaanilu suliffissuaqarnermik ineriartortitsineq apeqqummik tamatuminnga ulorianartorsiortitsinngitsumik ingerlanneqarsinnaanersut eqqartorneqarlutik.