Ruslandip Issittumi Siunnersuisoqatigiinni suleqatigiinnissamut politikki peerpaa
Ruslandip Issittumi Siunnersuisoqatigiinni suleqatigiinnissamut oqaaseqatigiit, nunap Issittumi politikkianit præsident Vladimir Putinimit peerneqarput. Ruslandip taarsiullugu nammineq soqutigisani salliutinniarpai.
Rusland Issittoq pillugu nunap politikkiani uani sapaatip akunnerani allannguivoq.
Præsident Putin allannguineq pillugu inassummik marlunngornermi atsiorpoq, tusagassiorfiullu Highnorthnewsip, Issittumi Siunnersuisoqatigiinni suleqatigiinneq pillugu oqaaseqaat qitiusoq peerneqarsimasoq oqaluttuaraa.
Politikki siullermik marsimi 2020-mi saqqummersinneqartumi, ”Issittumi naalagaaffinnut sanilerisanut pitsaasumik attaveqarnerup nukittorsarneqarnissaanut” kaammattuivoq, aningaasaqarnikkut, ilisimatusarnikkut, kulturikkut aamma nunap killingi akimorlugit suleqatigiinnikkut, taannalu immikkoortoq peerneqarpoq, taarsiullugu ”nunanut allanut takornartanut niuernerup tungaatigut attaviit ineriartortinneqassapput, […] Ruslandip Naalagaaffiata Issittumi soqutigisai naapertorlugit.
Issittumi Siunnersuisoqatigiinni suleqatigiinneq Ruslandip saassussinera pissutigalugu marsimi 2022-miilli unitsikkallarneqarnikuupput, Siunnersuisoqatigiillu Ruslandip politikkiata nutarterneqarnerata kingorna oqaatigineqanngilaq.
Amerikamiut aallartitaata, Derek Chollet, sapaatip akunnerani kingullermi, USA-p Issittumi Siunnersuisoqatigiinni Rusland peqataatinnagu suliniutit aalajangersimasut aallarteqqinniarlugit oqarnerata kingorna, russit politikkianni allannguineq pivoq.
Ilisimatusartut: Kalaallit Nunaannut politikkikkut unammilligassaqartoq
- Ruslandip piffissami qanittumi pissusilersuutini allanngussagai ajoraluartumik naatsorsuutiginngilarput. Piviusup nutaap Moskvap piliaa naleqqussarfigigatsigu, Issittumi Siunnersuisoqatigiit suliniutaat Ruslandip peqataaffiginngisai aallarteqqippavut, Derek Chollet, Highnorthnews naapertorlugu, Wilson Center Polarinstitutimi taama oqaaseqarpoq.
Issittumi Siunnersuisoqatigiit uninngagallarnerat politikkikkut unammilligassaqartitsisoq, Ilisimatusarfimmi ilisimatusartut marluk Rasmus Leander Nielsen aamma Jeppe Strandsbjerg, Altinget-imi oqallissaarummi allapput.
Piffissaq ungasinnerusoq eqqarsaatigalugu, Ruslandip Issittup eqqissisimatitsiffiunissaa attanniarlugu suleqatigiinnermut ilannguteqqinnissaa kissaatigalugu, kalaallit politikerii aamma atorfilittat oqariartuuteqarniuupput. Kisianni Ukrainemi sorsunneq pissutigalugu tamanna ajornakusoornerulersimasoq, ilisimatusartut naliliipput.