Ruslandimut pillaatitut iliuusissanik atuutsitsilernissaq pillugu inatsit piareerneqalersoq

Naalakkersuisut siusinnerusukkut nalunaarutiginikuuaat, Ruslandip Ukrainemut saassussinerata malitsigisaanik Ruslandimut pillaatitut iliuuseqartoqarneranut tapersiiniarlutik.

Kalaallilli Nunaanniit pillaatitut iliuuseqartoqassppata, assersuutigalugu EU-mit akuerineqarsimasunik, taava Kalalalit Nunaanni inatsimmik Naalakkersuisut pillaatitut iliuuseqarnissaanut akuersisumik suliaqartoqartariaqarpoq.

Inatsisissatut siunnersuummi Namminersorlutik Oqartussanit tusarniaassutigineqartumi taamatut allassimasoqarpoq. Inatsisissatut siunnersuut naapertorlugu, Naalakkersuisut EU-p, FN-ip nunallu allat Ruslandimut pillaatitut iliuuserisaannut tapersiillutik pillaassuteqarsinnaanngussapput.

Siunnersuut ilaatigut pillaatissatut killilersuutissatullu ukunannga imaqarpoq:

• Aningaasaqarnikkut killilersuinerit arlallit, ilaatigut Ruslandimi allanilu pisortat kiisalu namminersortut aningaasalersuinissaat imaluunniit niuernermut imaluunniit aningaasaliinermut aningaasanik ikiuunnissaat inerteqqutigineqarluni.
• Avammut nioqquteqarnissamik inerteqquteqarneq kiisalu Ruslandip Kalaallit Nunaanni nunanilu tamalaani niuerfinnut isersinnaanera annikillisinniarlugit niuernerup assartuinerullu iluanni killilersuinerit.
• Kalaallit Nunaanni russit pigisaannik nalilinnik, taakkuninnga peqarsimassappat, tigusisinnaajunnaarsitsineq.
• Misissuinerit, ilinniartitaanerup, kultureqarnerup assigisaasalu iluanni suliniutit unitsikkallarneqarnissaannik peqqusissuteqarneq.

Pissarsiffik: Naalakkersuisut

Kalaallit Nunaat ukiumut milliardit affaannik nalilimmik aalisakkanik raajanillu Ruslandimut tunisaqartoqartarpoq.

Kinguneqaatissat erseqqissut nalornissutaasut

Siunnersuummi pillaatissanik aalajangersimasuni atuutsitsilertoqarnianngilaq, Naalakkersuisulli pillaatitut iliuuseqarsinnaalersinneqassallutik. Taamaammat inatsisissatut siunnersuutip aningaasaqarnermut kingunerisinnaasai erseqqissumik saqqummiunneqarsimanngillat, Inatsisissatulli siunnersuummut atortuni imatut allassimasoqarpoq:

- Naatsorsuutigineqarpoq akerleriinnerup paasinarsisinneqarnissaata imaluunniit unitsinneqarnissaata tungaanut suliffeqarfiit kattuffiillu avammut nioqquteqarneq, niuerneq aamma Ruslandimik suleqateqarneq tamaat unitsikkallassagaat.

- Tamanna inuussutissarsiortunut aningaasaqarnikkut allaffissornikkullu sunniuteqarnernik malitseqarsinnaavoq, tassami avammut nioqquteqarnerup niuernerullu unitsikkallarneqarnerat aningaasaqarnikkut annaasaqarnermik malitseqarsinnaammat, siunnersuummut nassuiaammi allassimavoq.