Skip to main content

Ruslandimut pillaatitut iliuuseqartarnissaq Inatsisartut akueraat

Naalakkersuisut siulittaasuata Múte B. Egedep, Ruslandimut allanullu pillaatitut iliuusissanik atuutsitsilernissamut piginnnaatitsissuteqarneq pillugu inatsisissatut siunnersuutaa, partiit tamarmik taperserpaat.

Ruslandip Ukrainellu akornanni sakkulersorluni aaqqiagiinngittoqarnerani Naalakkersuisut Ruslandimut pillaatitut iliuuseqarsinnaapput.

Naalakkersuisut siulittaasuata, Múte B. Egedep inatsisissatut siunnersuutaa allanngortinneqarani Inatsisartunit akuersissutigineqarpoq.

Inatsit Inatsisartuni ullumi 19. maj tuaviortumik suliarineqarpoq, tassa siullermeerneqarnera, aappassaaneerneqarnera pingajussaaneerneqarneralu ullormi ataatsimi ingerlanneqarami. 20-t akuersillutik taasipput, itigartitsisoqanngilaq taasinngitsoortoqaranilu.

Ruslandimut pillaatitut iliuusissat ilaaffigilernissaannik aalajangernissaq sioqqullugu Inatsisartuni nunanut allanut sillimaniarnermullu ataatsimiititaliaq Naalakkersuisunit isumasioqqaarneqartassapput.

Inatsisissatut siunnersuut partiinit tamanit ilalerneqarpoq.

IA-p oqaaseqartartua Harald Bianco oqarpoq eqqaamaneqartariaqartoq Ruslandimi nunatta naggueqatigisaannik inoqarmat, Ruslandilu sakkuaakkunnaarpat taakku suleqatigineqaqqissinnaaneri eqqaamaneqartariaqartut:

- Eqqaamassavarput naggueqateqaratta. Aamma eqqaamassavarput sakkuaalluni aaqqiagiinnginneq qaangiussimalerpat naggueqatigut Ruslandimiittut suleqatigiumallugit assatsinnik isaassisinnaasariaqaratta. Maannakkumulli Naalakkersuisut siulittaasuata siunnersuutaa taamaatsillugu taperserparput, Harald Bianco oqaluttarfimmiit oqarpoq.

Tunngaviusumi inatsimmi ilaasariaqartoq

Siumut aamma Naleraq isumaqarput Naalakkersuisut Inatsisartullu annertuumik alloriartut Naalagaaffiit Peqatigiit nalunaarutaannik unioqqutitsisunut pillaatitut iliuusissanut ilaasalernissamut inatsimmik suliaqarnermi.

Aalajangernerit taama ittut Kalaallit Nunaata namminiileruni suliarisalerumaarai erseqissarneqarput.

- Akerleriinnermi sakkuaanneq akuerinngisaannarparput. Isumaqarpugullu aaqqiagiinnginnermi oqaloqatigiinnikkut aaqqiissummik nassaartoqarsinnaanera pitsaanerpaasoq. Kalaallit Nunaata EU-p pillaatitut iliuusissaanut ilanngutsikkumallugu isumaqarpugut. Ilaatigut visumimut tunngasut aamma aningaaserivinnit nuussinernut mattussinernut ilaalu ilanngullugit tunngasuupput, Kuno Fencker (S) oqarpoq.

- Kalaallit Nunaata namminiilivinnissaa partiitta sulissutigaa. Pingaaruteqarporlu nunat allat killeqarfiinik ataqqinnigatik saassussisoqartillugu pillaatitut iliuusissanut tunngasumik nunarput tunngaviusumik inatsimmi allassimasoqalernissaa. Maannakkumut inatsisissatut siunnersuut taamaatsillugu akueraarput, Pele Broberg (N) oqarpoq.

Tunngaviusumik inatsimmi nunat killeqarfinnik ataqqinnigatik sakkuaallutik saassussisut pillaateqartinnissaanut tunngasumik allassimasoqalernissaanik Siumut aamma Naleqqap piumasaqarnera Naalakkersuisut siulittaasuata, Múte B. Egedep maluginiarpaa.

Ataatsimiititaliaq peqataasassaaq

Demokraatit aamma akuersipput, Naalakkersuisulli Inatsisartunut sanilliullugu pissaaneqangaatsialernissaat ernumagalugu, ataatsimiititaliaq susassaqartoq peqataatinneqarnissaa piumasaraa.

Anna Wangenheimillu aamma kissaatigaa nunatta Ruslandillu attavii suunersut qulaajarneqassasut. Anna Wangenheim naapertorlugu peqqinnissaqarfik russinik ingerlanneqartumik IT-mik sullinneqarnikuusimavoq. Taamaammat attaveqaatitigut saassussisoqarsinnaanera, tamannalu innuttaasunut qanoq sunniuteqarsinnaanera ernumagalugu oqariartuutigaa.

Ernumagisalli taareerlugit, Demokraatit inatsimmut taperseeqataapput.

- Sapinngisarput tamaat atorlugu Rusland ajornartorsiortissavarput, sakkutuumi Ukrainimiit qimagutsinnissaasa tungaanut, taamaalillutik Ukraiinermiut nunartik kiffaanngissusertillu utertinniassammasuk, Anna Wangenheim oqarpoq.

Atassut annerusumik oqaaseqartitsigani inatsimmut aamma tapersiivoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER